مشرق وسطیٰ سے سپلائی میں اضافہ، خام تیل کی قیمتوں میں کمی

عالمی منڈی میں خام تیل کی قیمتیں پیر کو کم ہوگئیں، کیونکہ مشرق وسطیٰ سے خام تیل کی برآمدات میں اضافہ اور گروپ آف سیون ممالک کی جانب سے ہنگامی ذخائر سے تیل جاری کرنے کے فیصلے نے سپلائی بڑھا دی ہے، تاہم ایران جنگ کے باعث خلیجی خطے کے تیل کے بنیادی ڈھانچے کو مزید نقصان پہنچنے کے خدشات برقرار ہیں۔

برینٹ خام تیل کے سودے 35 سینٹ یا 0.34 فیصد کمی سے 101.90 ڈالر فی بیرل پر آگئے، جبکہ امریکی ویسٹ ٹیکساس انٹرمیڈیٹ خام تیل کی قیمت 62 سینٹ یا 0.68 فیصد کمی کے بعد 90.49 ڈالر فی بیرل رہی۔

گزشتہ ہفتے برینٹ کے بیشتر اضافے ختم ہوگئے، جبکہ ڈبلیو ٹی آئی کی قیمت میں 1.6 فیصد کمی ریکارڈ کی گئی۔ گروپ آف سیون ممالک نے جمعہ کو ہنگامی ذخائر سے 10 کروڑ بیرل ڈیزل اور خام تیل جاری کرنے پر اتفاق کیا تھا۔

شپنگ ڈیٹا کے مطابق ستمبر کے آخری ہفتے کے سات میں سے چار دن مشرق وسطیٰ سے خام تیل کی برآمدات جنگ سے قبل کی سطح سے تجاوز کرگئیں، اگرچہ آبنائے ہرمز سے گزرنے والے بحری جہازوں پر حملے جاری رہے۔

کے سی ایم ٹریڈ کے چیف تجزیہ کار ٹم واٹرر نے کہا کہ جی سیون کے فیصلے سے فوری سپلائی خدشات کم ہوئے ہیں، جبکہ سعودی عرب کی برآمدات بھی جنگ سے پہلے کی سطح کی جانب واپس آ رہی ہیں۔

دریں اثنا حوثیوں نے سعودی عرب میں آرامکو تنصیبات پر میزائل اور ڈرون حملوں کا دعویٰ کیا ہے۔ دوسری جانب سعودی حمایت یافتہ یمنی حکومت نے حوثیوں کے زیر قبضہ علاقوں کو واپس لینے کے لیے بڑی فوجی کارروائی شروع کرنے کا اعلان کیا۔

آرامکو نے نومبر کے لیے ایشیا کو خام تیل کی قیمتیں غیر متوقع طور پر چھ سال کی کم ترین سطح تک کم کردی ہیں۔ ادھر اوپیک پلس نے 2027 کے تیل پیداوار کوٹے کے جائزے کو مؤخر کردیا ہے، جبکہ یوکرین کے صدر ولودیمیر زیلنسکی نے کہا ہے کہ یوکرین روسی آئل ریفائنریوں پر حملے مزید تیز کرے گا۔