عمران حلیم شیخ 29 ستمبر سے بینک اسلامی کے صدر و سی ای او کا عہدہ سنبھالیں گے

پاکستان کے معروف اسلامی مالیاتی ادارے بینک اسلامی پاکستان لمیٹڈ نے اپنے ڈپٹی چیف ایگزیکٹو آفیسر عمران حلیم شیخ کو 29 ستمبر 2026 سے 3 سال کی مدت کیلئے صدر اور چیف ایگزیکٹو آفیسر مقرر کردیا ہے۔

بینک نے پیر کو پاکستان اسٹاک ایکسچینج (پی ایس ایکس) کو جاری کیے گئے نوٹس میں اس بارے میں آگاہ کیا۔

نوٹس کے مطابق عمران حلیم شیخ 29 ستمبر 2026 سے بینک اسلامی پاکستان لمیٹڈ کے صدر اور چیف ایگزیکٹو آفیسر کی حیثیت سے ذمہ داریاں سنبھالیں گے۔

گزشتہ ماہ بینک اسلامی کے بورڈ نے فیصلہ کیا تھا کہ رضوان عطا 28 ستمبر 2026 کو اپنی موجودہ تین سالہ مدت کی تکمیل تک بینک کے صدر اور چیف ایگزیکٹو آفیسر کی حیثیت سے خدمات انجام دیتے رہیں گے۔

بینک اسلامی نے اس وقت کہا تھا کہ بورڈ نے رضوان عطا کی کاوشوں کو تسلیم کیا اور ان کو سراہا۔

بینک نے مزید اعلان کیا کہ عمران حلیم شیخ کو 29 ستمبر 2026 سے تین سال کی مدت کے لیے بینک کا آئندہ صدر اور چیف ایگزیکٹو آفیسر مقرر کیا گیا ہے۔

بینک اسلامی پاکستان لمیٹڈ کو 2004 میں پاکستان میں پبلک لمیٹڈ کمپنی کے طور پر قائم کیا گیا تھا جس کے بانی جہانگیر صدیقی اینڈ کمپنی لمیٹڈ اور رندری خاندان تھے۔

بعد ازاں 2005 میں دبئی بینک بھی بطور بانی شیئر ہولڈر بینک میں شامل ہوگیا۔

اسٹیٹ بینک آف پاکستان کی 2003 کی اسلامی بینکاری پالیسی کے تحت بینک کو 2005 میں شیڈولڈ اسلامک کمرشل بینک کے طور پر لائسنس جاری کیا گیا جبکہ اس نے باضابطہ طور پر 7 اپریل 2006 کو اپنی کاروباری سرگرمیوں کا آغاز کیا۔