امریکا میں گاڑیوں کے ایندھن کی بچت کے معیارات میں نمایاں کمی کا فیصلہ

امریکی محکمہ ٹرانسپورٹیشن پیر کو 2031 تک گاڑیوں کے ایندھن کی بچت کے معیارات میں نمایاں کمی کا اعلان کرے گا، جس کے ذریعے سابق صدر جو بائیڈن کی جانب سے گاڑی ساز کمپنیوں کو زیادہ الیکٹرک گاڑیاں تیار کرنے پر مجبور کرنے کی پالیسی کو تبدیل کیا جائے گا۔

صدر ڈونلڈ ٹرمپ نے کہا ہے کہ انہوں نے کاروں اور ٹرکوں کے لیے نئے ایندھن بچت معیارات کی منظوری دے دی ہے، جس سے نئی گاڑیوں کی قیمتیں کم ہوں گی۔ ٹرانسپورٹیشن سیکریٹری شان ڈفی نے اسے امریکی آٹو ورکرز کے لیے بڑی کامیابی قرار دیا۔

محکمے کے تخمینے کے مطابق نئے معیارات سے نئی گاڑیوں کی لاگت میں اوسطاً 930 ڈالر کمی آئے گی، تاہم اس کے نتیجے میں ایندھن کا استعمال اور کاربن ڈائی آکسائیڈ کا اخراج بڑھ جائے گا۔

بائیڈن انتظامیہ نے 2024 اور 2025 ماڈل گاڑیوں کے لیے ایندھن کی کارکردگی میں سالانہ 8 فیصد اور 2026 کے لیے 10 فیصد اضافہ مقرر کیا تھا، جبکہ 2027 سے 2031 تک سالانہ 2 فیصد اضافے کی شرط عائد کی گئی تھی۔

ٹرمپ انتظامیہ نے 2031 تک اوسط فیول اکانومی معیار 50.4 میل فی گیلن سے کم کرکے 34.5 میل فی گیلن کرنے کی تجویز دی ہے۔ محکمے کے مطابق اس تبدیلی سے 2050 تک تقریباً 100 ارب گیلن اضافی ایندھن استعمال ہوگا اور کاربن ڈائی آکسائیڈ اخراج میں تقریباً 5 فیصد اضافہ ہوگا۔