عالمی کرنسی مارکیٹ میں محتاط کاروبار، بانڈ ییلڈز میں اضافہ

عالمی کرنسی مارکیٹ میں جمعرات کو محتاط تجارت کے دوران قیمتوں میں محدود اتار چڑھاؤ دیکھا گیا، جبکہ سرمایہ کار تیل کی قیمتوں میں تازہ اضافے، عالمی بانڈ ییلڈز اور جاپانی ین کی تیزی کا جائزہ لیتے رہے۔ امریکی پی پی آئی اور افراطِ زر کے اعداد و شمار سے قبل ین کی مضبوط ریلی بھی رک گئی۔

برینٹ خام تیل بدھ کو 100 ڈالر فی بیرل کی سطح عبور کرنے کے بعد جمعرات کو بھی اسی سطح سے اوپر رہا۔ ایران اور امریکا کے درمیان بحری جہازوں پر حملوں کی تازہ لہر نے مشرق وسطیٰ سے توانائی کی سپلائی میں مزید خلل کے خدشات بڑھا دیے ہیں۔

توانائی کی قیمتوں سے افراطِ زر کے دباؤ میں اضافے کے باعث عالمی بانڈ ییلڈز دوبارہ بڑھ گئیں، جبکہ 10 سالہ امریکی ٹریژری بانڈ کی ییلڈ 2023 کے بعد بلند ترین سطح پر پہنچ گئی۔

ڈالر انڈیکس 98.81 پر رہا، جبکہ یورو 1.1633 ڈالر اور پاؤنڈ 1.3547 ڈالر پر معمولی کمزور ہوئے۔ ین بھی سات ماہ کی بلند سطح پر پہنچنے کے بعد معمولی کمزور ہوکر 153.70 فی ڈالر ہوگیا۔

سرمایہ کار اب امریکی افراطِ زر کے اعداد و شمار پر توجہ مرکوز کیے ہوئے ہیں۔ پروڈیوسر پرائس انڈیکس جمعرات جبکہ صارفین کی قیمتوں کا اشاریہ جمعہ کو جاری ہوگا۔ یہ اعداد و شمار 15 اور 16 ستمبر کے فیڈرل اوپن مارکیٹ کمیٹی اجلاس سے قبل اہم ترین اعداد و شمار ہوں گے۔

تاجروں کے مطابق رواں ماہ امریکی فیڈرل ریزرو کی شرح سود میں اضافے کا امکان تقریباً 60 فیصد ہے۔