اسٹاک مارکیٹ میں سرمایہ کاری کیلئے شریعہ کمپلائنٹ بروکریج سیگمنٹ قائم

اسٹاک مارکیٹ میں سرمایہ کاری کیلئے شریعہ کمپلائنٹ بروکریج سیگمنٹ قائم کردیا گیا ہے۔

سیکیورٹیز اینڈ ایکسچینج کمیشن آف پاکستان (ایس ای سی پی) نے کیپٹل مارکیٹ میں اسلامی سرمایہ کاری کو فروغ دینے کیلئے شرعی اصولوں کے مطابق بروکریج سیگمنٹ قائم کردیا ہے۔

ایس ای سی پی نے بدھ کو جاری کردہ ایک بیان میں بتایا کہ 33 بروکریج ہاؤسز نے مخصوص اسلامی ونڈوز کے ذریعے خدمات کا آغاز کردیا ہے۔ کمیشن کے مطابق اسلامی بروکریج ونڈوز کے ذریعے سرمایہ کار شرعی اصولوں کے مطابق حصص، سکوک اور اسلامی ایکسچینج ٹریڈڈ فنڈز میں براہِ راست سرمایہ کاری کرسکیں گے۔

ریگولیٹر نے بتایا کہ اسلامی بروکریج ونڈوز استعمال کرنے والے سرمایہ کاروں کے فنڈز اسلامی بینکاری کے ذرائع کے ذریعے استعمال کیے جائیں گے جبکہ ان پلیٹ فارمز کے ذریعے سرمایہ کاری کو صرف شرعی اصولوں کے مطابق سیکیورٹیز تک محدود رکھا جائے گا۔

انہوں نے مزید کہا کہ اسلامی بروکرز کو سرمایہ کاروں کو سود پر مبنی فنانسنگ یا غیر شرعی لیوریج فنانسنگ فراہم کرنے کی اجازت نہیں ہوگی۔

ریگولیٹر کے مطابق پاکستان اسٹاک ایکسچینج میں لسٹڈ 535 سیکیورٹیز میں سے 308 اس وقت شرعی اصولوں کے مطابق ہیں جو ایکسچینج کی مجموعی مارکیٹ کیپٹلائزیشن کا تقریباً 65 فیصد بنتی ہیں۔

ایس ای سی پی کے چیئرمین ڈاکٹر کبیر صدیقی نے کہا کہ شرعی اصولوں کے مطابق بروکریج کو فروغ دینا سود سے پاک معیشت کی جانب ایک اہم قدم ہے۔

انہوں نے کہا کہ سرمایہ کاروں کو شفاف اور قابلِ اعتماد اسلامی سرمایہ کاری کے مواقع فراہم کرنا ترجیح ہے۔ شرعی اصولوں کے مطابق سرمایہ کاری کے مواقع کی دستیابی سے نئے سرمایہ کاروں کو متوجہ کرکے کیپٹل مارکیٹ میں سرمایہ کاروں کی شرکت کو وسعت دینے میں مدد ملے گی۔

ریگولیٹر نے کہا کہ اس اقدام سے سرمایہ کاروں کو اسلامی سرمایہ کاری کی مصنوعات تک زیادہ رسائی حاصل ہوگی