جنگ کے خاتمے سے متعلق غیر یقینی صورتحال، برینٹ خام تیل ایک ڈالر مہنگا

برینٹ خام تیل کی قیمت جمعہ کو ایک ڈالر فی بیرل سے زائد بڑھ گئی جس کی وجہ آبنائے ہرمز میں اہم بحری گزرگاہ کو دوبارہ کھولنے اور اس کا کنٹرول طے کرنے کے لیے جاری مذاکرات کے نتائج سے متعلق بدستور غیر یقینی صورتحال برقرار ہے۔

برینٹ خام تیل کے سودے 83.55 ڈالر فی بیرل کی سطح پر بند ہوئے جس میں 1.06 ڈالر (یا 1.3 فیصد) کا اضافہ ہوا جب کہ ویسٹ ٹیکساس انٹرمیڈیٹ (ڈبلیو ٹی آئی) کے سودے 78.18 ڈالر فی بیرل پر بند ہوئے جن میں 89 سینٹس (یا 1.15 فیصد) کا اضافہ ریکارڈ کیا گیا۔

جمعرات کو خام تیل کے سودے 3 ڈالر فی بیرل سے زائد اضافے کے ساتھ بند ہوئے جس کی وجہ ایران کی جانب سے ایسے بل کا جائزہ لینا ہے جس کے تحت آبنائے ہرمز میں امریکی اور اسرائیلی جہازوں پر پابندی عائد کی جاسکتی ہے۔ جنگ شروع ہونے سے قبل دنیا کے تقریباً پانچویں حصے کے تیل اور مائع قدرتی گیس (ایل این جی) کی ترسیل معمول کے مطابق اسی راستے سے ہوتی تھی۔

ہفتے کے آغاز میں تیل کی قیمتیں اس توقع پر گرگئی تھیں کہ تنازع کے ممکنہ حل کے امکانات بڑھ رہے ہیں۔ فروری کے آخر میں امریکا اور اسرائیل کی جانب سے ایران پر مشترکہ حملے کے بعد شروع ہونے والے تنازع کے دوران یہ صورتحال بار بار بدلتی رہی ہے اور اب یہ جنگ چھٹے ماہ میں داخل ہوچکی ہے۔ برینٹ کی قیمت میں ہفتہ وار بنیاد پر 8 فیصد سے زائد کمی جبکہ ڈبلیو ٹی آئی میں 7 فیصد سے زائد کمی متوقع تھی۔

آئل مارکیٹ کے تجزیاتی ادارے وانڈا انسائٹس کی بانی وندھنا ہری نے کہا کہ اگرچہ ممکنہ معاہدے کے حوالے سے اس ہفتے کے اشاروں نے مارکیٹ کے جذبات میں اتار چڑھاؤ پیدا کردیا ہے لیکن مارکیٹ اب بھی اس بات سے اندھیرے میں ہے کہ معاہدے کو حتمی شکل دینے کے لیے کیا ہونا ضروری ہے۔

لپو آئل ایسوسی ایٹس کے صدر اینڈریو لپو نے کہا کہ مارکیٹ یہ جاننے کی کوشش کر رہی ہے کہ آیا ایران اور عمان کے درمیان کوئی معاہدہ کسی امریکی پرچم بردار جہاز کو آبنائے ہرمز سے گزرنے کی اجازت دے گا؟ کیا یہ کسی امریکی ملکیت والے جہاز کو گزرنے کی اجازت دے گا؟ کیا یہ کسی ایسے جہاز کو گزرنے کی اجازت دے گا جو کسی امریکی بندرگاہ کی طرف جارہا ہو؟

ایران اور عمان کے بارے میں بتایا گیا ہے کہ انہوں نے آبنائے ہرمز سے گزرنے والے بحری جہازوں کے لیے طے شدہ بحری راستے پر اتفاق کرلیا ہے۔ یہ آبنائے دونوں ممالک کے درمیان واقع ہے، تاہم یہ واضح نہیں کہ امریکا ان شرائط سے اتفاق کرے گا یا نہیں۔

تجزیہ کاروں نے مزید کہا کہ اس ہفتے ہونے والی پیشرفت سے یہ اشارہ بھی ملتا ہے کہ ایران اور امریکا کے درمیان کشیدگی ابھی ختم نہیں ہوئی۔