وسیع ہوتی جنگ میں مزید ممالک کی شمولیت، امریکہ کا ایران پر تازہ فضائی حملے

امریکی فوج کے مطابق امریکہ نے بدھ کو ایران میں نئے فضائی حملے کیے جس سے پانچ ماہ سے جاری جنگ مزید شدت اختیار کرگئی۔ یہ تنازع پہلے ہی اپنے مرکزی محاذوں سے آگے بڑھ کر خطے کے مزید ممالک کو اپنی لپیٹ میں لیتا جارہا ہے۔

امریکی سینٹرل کمانڈ نے ایک بیان میں کہا کہ امریکی فوج نے ایران کے خلاف حملوں کا آغاز کردیا ہے۔

یہ حملے کل مشرق وسطیٰ میں مقیم امریکی فوجیوں پر ایرانی حملے کی کوشش کا ایک طاقتور جواب ہیں۔

برطانوی میری ٹائم سکیورٹی کمپنی ایمبری کے ابتدائی جائزے کے مطابق بدھ کو مصر کی بحیرۂ روم میں واقع دمیاط بندرگاہ پر امریکی ملکیت کے گیس ذخیرہ کرنے والے ایک ٹینکر کو ڈرون حملے کا نشانہ بنایا گیا۔ اسی دوران امریکی اور سعودی افواج نے مشرقی عراق میں ایران کے حمایت یافتہ گروہوں پر حملے کیے جبکہ ایران نے اردن میں تعینات امریکی فوجیوں پر میزائل داغے۔

مصر کی وزارتِ پیٹرولیم کے ایک بیان میں بندرگاہ پر آگ لگنے کی تصدیق کی گئی لیکن ڈرون حملے کا کوئی ذکر نہیں کیا گیا۔ یہ فوری طور پر واضح نہیں ہوسکا کہ اس کا ذمہ دار کون ہے۔

عراق اور مصر میں ہونے والے ان تازہ حملوں نے مزید مشرق وسطیٰ کے ممالک کو اس تنازع میں گھسیٹنے کا خطرہ پیدا کردیا ہے، اس سے پہلے پچھلے ہفتے یمن میں ایران کے حامی حوثیوں نے سعودی عرب کی بحری ناکہ بندی کا اعلان کیا تھا۔

بدھ کو ایران میں ہونے والے امریکی حملے امریکی فوجیوں پر فائرنگ کرنے پر ایران سے انتقام لینے کے لیے صدر ڈونلڈ ٹرمپ کے اس عزم کے بعد سامنے آئے جو انہوں نے دن میں پہلے ظاہر کیا تھا۔

ٹرمپ نے وائٹ ہاؤس میں نامہ نگاروں سے بات کرتے ہوئے کہا کہ اب ہماری باری ہے اور ساتھ ہی یہ وعدہ بھی کیا کہ ہم انہیں بہت زوردار ضرب لگائیں گے، اگرچہ انہوں نے ایک بار پھر کہا کہ واشنگٹن تہران کے ساتھ امن معاہدے کی کوششیں جاری رکھے گا۔

ایران نے راتوں رات اس بات کی تصدیق کی کہ اس نے اردن میں امریکی اڈوں اور آبنائے ہرمز میں بحری جہازوں پر فائرنگ کی ہے اور تیل اور گیس کے لیے ایک اہم عالمی بحری گزرگاہ آبنائے ہرمز کے مشترکہ انتظام سے متعلق عمان کی تجویز کو بھی مسترد کردیا۔

یہ جنگ فروری میں اس وقت شروع ہوئی جب امریکہ اور اسرائیل نے ایران میں بمباری شروع کی جس کے بارے میں ٹرمپ کا کہنا تھا کہ یہ صرف چند ہفتے جاری رہے گی۔ جون میں عارضی جنگ بندی کا معاہدہ آبنائے پر دوبارہ شروع ہونے والی لڑائی کے دوران ٹوٹ گیا جس پر ایران کا کہنا ہے کہ اب اس کا کنٹرول ہے۔

پانچ ماہ پرانی اس جنگ کے دوران بدھ کو تیل کی قیمتوں میں تیز ترین اضافے میں سے ایک دیکھا گیا۔ برینٹ کروڈ فیوچرز میں 8 فیصد سے زائد کا اضافہ ہوا جس سے یہ بینچ مارک 90 ڈالر فی بیرل سے نمایاں اوپر چلا گیا اور اس طرح اس کمی کا بیشتر حصہ پورا ہو گیا جو اس ہفتے کے شروع میں اس وقت آئی تھی جب ٹرمپ نے غیر متوقع طور پر امریکی حملے روک دیے تھے۔