ملک بھر میں بارشوں سے مزید 11 افراد جاں بحق، 25 زخمی

قومی ڈیزاسٹر مینجمنٹ اتھارٹی (این ڈی ایم اے) کے مطابق گزشتہ 24 گھنٹوں کے دوران پاکستان بھر میں بارشوں سے متعلق مختلف حادثات میں کم از کم 11 افراد جاں بحق اور 25 زخمی ہوئے، جس کے بعد 26 جون سے جاری مون سون سیزن کے دوران ہلاکتوں کی مجموعی تعداد 97 ہو گئی ہے۔

این ڈی ایم اے کی جانب سے ہفتے کو جاری کردہ روزانہ کی صورتحال رپورٹ کے مطابق حالیہ ہلاکتوں میں پنجاب سے 7، سندھ سے 2، جبکہ خیبرپختونخوا اور گلگت بلتستان سے ایک، ایک شخص شامل ہے۔

رپورٹ کے مطابق گزشتہ 24 گھنٹوں کے دوران 25 افراد زخمی بھی ہوئے، جن میں 20 پنجاب، 3 خیبرپختونخوا اور 2 سندھ سے تعلق رکھتے ہیں۔

26 جون سے اب تک بارشوں سے زخمی ہونے والوں کی مجموعی تعداد 297 تک پہنچ چکی ہے۔

این ڈی ایم اے کے مطابق گزشتہ 24 گھنٹوں کے دوران 22 مکانات کو نقصان پہنچا جبکہ 8 مویشی ہلاک ہوئے۔ اس طرح رواں مون سون سیزن میں 447 مکانات متاثر اور 269 مویشی ہلاک ہو چکے ہیں۔

این ڈی ایم اے نے عوام سے اپیل کی ہے کہ مون سون بارشوں کے دوران احتیاطی تدابیر اختیار کریں، غیر ضروری سفر سے گریز کریں اور اپنی حفاظت کے لیے متعلقہ اداروں کی جانب سے جاری کردہ ہدایات اور موسمی انتباہات پر عمل کریں۔