سندھ میں پراپرٹی ٹیکس وصولی بڑھانے کے لیے ورلڈ بینک کا 15 کروڑ ڈالر منصوبہ

ورلڈ بینک سندھ کے شہری جائیداد ٹیکس کے نظام کی اصلاح کے لیے 15 کروڑ ڈالر (150 ملین امریکی ڈالر) کے مالیاتی پروگرام کی تیاری کر رہا ہے جس کا مقصد ٹیکس وصولیوں میں اضافہ، بلدیاتی اداروں کے مالی وسائل کو مضبوط بنانا اور صوبے کی 45 مقامی کونسلوں میں عوامی خدمات کی فراہمی کو بہتر بنانا ہے۔

ورلڈ بینک کی دستاویز کے مطابق سندھ پراپرٹی ریونیو انہانسمنٹ پروگرام کی تجویز 31 اگست 2026 کو ہونے والے تکنیکی جائزے کے بعد رواں سال منظوری کیلئے پیش کی جائے گی۔

اس پروگرام کی مالی معاونت انٹرنیشنل بینک فار ریکنسٹرکشن اینڈ ڈویلپمنٹ کے ذریعے پروگرام فار رزلٹس مالیاتی طریقہ کار کے تحت کی جائے گی، جو ٹیکس وصولیوں اور اخراجات کے انتظام میں قابلِ پیمائش بہتری سے مالی معاونت کو مشروط کرنے کی ورلڈ بینک کی حکمت عملی کی عکاسی کرتا ہے۔

ورلڈ بینک نے کہا ہے کہ پاکستان کا اربن اموویبل پراپرٹی ٹیکس مقامی ترقی کی مالی معاونت کی صلاحیت رکھنے کے باوجود ملک کے سب سے کم استعمال ہونے والے محصولات کے ذرائع میں سے ایک ہے۔ بینک نے نشاندہی کی کہ انتظامی صلاحیت کی کمزوری، جائیداد کے نامکمل ریکارڈ اور ناقص نفاذ کی وجہ سے پراپرٹی ٹیکس کی آمدنی جی ڈی پی کے صرف 0.13 فیصد تک محدود ہے جو کہ اسی طرح کے کم اور درمیانی آمدنی والے ممالک میں جمع ہونے والے 0.3 سے 0.6 فیصد جی ڈی پی کے مقابلے میں بہت کم ہے۔

ورلڈ بینک نے مقامی حکومتوں کے صوبائی فنڈز پر شدید انحصار کو بھی اجاگر کیا اور کہا کہ مقامی حکومتوں کی 95 فیصد سے زائد آمدنی صوبائی گرانٹس سے آتی ہے جس کی وجہ سے میونسپلٹیز کے پاس مالیاتی خود مختاری یا اپنے وسائل کو متحرک کرنے کے لیے بہت کم ترغیب بچتی ہے۔ بینک کا کہنا ہے کہ اس ساختی کمزوری نے میونسپل خدمات اور انفرااسٹرکچر میں مسلسل خلا کو جنم دیا ہے۔

مجوزہ پروگرام ان چیلنجز سے نمٹنے کے لیے انتظامی نظام بنانے سے ہٹ کر، کارکردگی پر مبنی محصولات کی وصولی اور اخراجات کے انتظام کے فریم ورک کی طرف منتقلی کا خواہاں ہے۔

اس کا مجموعی ترقیاتی مقصد سندھ بھر کی 45 مقامی کونسلوں میں اربن اموویبل پراپرٹی ٹیکس (شہری جائیداد پر ٹیکس) کی وصولی اور اخراجات کے انتظام کو بہتر بنانا ہے۔

کاپی رائٹ بزنس ریکارڈر 2026