حکومت چینی کی مناسب قیمتوں پر بلا تعطل فراہمی یقینی بنانے کیلئے پرعزم

نائب وزیراعظم اسحاق ڈار نے ہفتے کو کہا ہے کہ حکومت ذخیرہ اندوزی، ناجائز منافع خوری اور مصنوعی مہنگائی کے خلاف عدم برداشت کی پالیسی پر عمل پیرا ہے۔

انہوں نے یہ بات اسلام آباد میں ملک بھر میں چینی کی دستیابی اور صارفین کیلئے اس کی قیمت میں استحکام یقینی بنانے کے حوالے سے اعلیٰ سطح کے اجلاس کی صدارت کرتے ہوئے کہی۔

اسحاق ڈار نے اس بات کا اعادہ کیا کہ حکومت چینی کی مناسب قیمتوں پر بلا تعطل فراہمی یقینی بنانے کیلئے پرعزم ہے۔

قومی غذائی تحفظ و تحقیق کی وزارت نے صوبائی محکمہ خوراک کے تعاون سے اجلاس کو چینی کے موجودہ ذخیرے، پیداوار کے تخمینوں اور مارکیٹ میں قیمتوں کے رجحانات سے آگاہ کیا۔

اجلاس نے اعداد و شمار کا تفصیلی جائزہ لینے کے بعد چینی کی دستیابی اور فراہمی کی موجودہ صورتحال پر اطمینان کا اظہار کیا۔

ایک اور اجلاس کے دوران جو پاکستان کی اقتصادی سفارت کاری کو بڑھانے کی کوششوں کا جائزہ لینے کے لیے بین الوزارتی اجلاس تھا نائب وزیراعظم و وزیر خارجہ اسحاق ڈار نے ہفتے کو زور دیا کہ پاکستان کی معیشت کو فروغ دینے کے لیے بین الاقوامی اور علاقائی سطح پر کوششوں کو تیز کرنا ضروری ہے۔

دفتر خارجہ کے ترجمان نے ایک پریس ریلیز میں بتایا کہ انہوں نے اس بات پر زور دیا کہ یہ کام بین الاقوامی معیارات اور ذمہ داریوں کی بہتر تعمیل کے ذریعے کیا جائے۔

اجلاس میں معاون خصوصی طارق باجوہ، سیکریٹری خارجہ، سیکریٹری کیبنٹ ڈویژن اور متعلقہ محکموں کے اعلیٰ حکام نے شرکت کی۔

اجلاس کے دوران نائب وزیراعظم و وزیر خارجہ نے پائیدار معاشی استحکام کے لیے حکومت کے عزم کا اعادہ کیا اور تمام اسٹیک ہولڈرز کو اس سلسلے میں اپنی کوششیں تیز کرنے کی ہدایت کی۔