ایران نے منگل کو دوحہ میں ملاقات کی درخواست کی ہے، ٹرمپ کا دعویٰ

امریکی صدر ڈونلڈ ٹرمپ نے کہا ہے کہ ایران نے ملاقات کی درخواست کی ہے، جو منگل کو خلیجی ملک قطر میں ہوگی، حالانکہ تہران اس سے قبل اس بات کی تردید کر چکا ہے کہ دونوں ممالک کے درمیان کسی مذاکرات کا منصوبہ ہے۔

ٹرمپ نے پیر کو اپنے سوشل میڈیا پلیٹ فارم ٹروتھ سوشل پر لکھا ہے کہ ”ایران نے ملاقات کی درخواست کی ہے۔ یہ کل دوحہ میں ہوگی!“

دوسری جانب ایران کی وزارت خارجہ نے پیر کو ان خبروں کی تردید کی کہ ایران اور امریکہ کی تکنیکی ٹیمیں مشرق وسطیٰ کی جنگ کے خاتمے کے لیے ہونے والے معاہدے پر عمل درآمد کے حوالے سے اس ہفتے ملاقات کریں گی۔

حالیہ دنوں میں دونوں ممالک نے خلیج میں ایک دوسرے پر حملے کیے ہیں، جس سے دونوں کے درمیان قائم نازک جنگ بندی کا امتحان ہوا ہے۔

ایران کے نائب وزیر خارجہ کاظم غریب آبادی نے سرکاری ٹی وی سے گفتگو کرتے ہوئے کہا، ”اس ہفتے ورکنگ گروپس کی کسی تکنیکی سطح کی ملاقات کا کوئی منصوبہ نہیں ہے۔“ ان کا اشارہ ایرانی ہفتے کی جانب تھا، جو جمعہ کو اختتام پذیر ہوتا ہے۔

قطر، پاکستان کے ساتھ مل کر، مشرق وسطیٰ کی جنگ کے خاتمے کے لیے ایران اور امریکہ کے درمیان ہونے والے مذاکرات میں ثالث کا کردار ادا کر رہا ہے۔

تہران اور واشنگٹن کے درمیان تازہ ترین مذاکرات 21 جون کو سوئٹزرلینڈ میں ہوئے تھے، جن میں چاروں ممالک کے وفود نے شرکت کی تھی۔