شرح سود میں اضافے کی توقعات، سونا دو ہفتوں کی کم ترین سطح پر آ گیا

عالمی منڈی میں سونے کی قیمتوں میں بدھ کے روز مسلسل کمی دیکھی گئی، کیونکہ امریکی شرح سود میں اضافے کی توقعات نے ڈالر کو مضبوط کر دیا جبکہ سرمایہ کار امریکا اور ایران کے درمیان امن مذاکرات سے متعلق متضاد بیانات کا جائزہ لیتے رہے۔

اسپاٹ گولڈ کی قیمت 0.5 فیصد کمی کے بعد 4,087.68 ڈالر فی اونس تک گر گئی، جو 11 جون کے بعد اس کی کم ترین سطح ہے۔ اسی طرح اگست کے لیے امریکی گولڈ فیوچرز 1.1 فیصد کمی کے ساتھ 4,105.40 ڈالر فی اونس پر آ گئے۔

ڈالر ایک سال سے زائد عرصے کی بلند ترین سطح پر پہنچ گیا، جس کے باعث بیرون ملک خریداروں کے لیے سونا مہنگا ہو گیا اور طلب پر دباؤ بڑھا۔

دوسری جانب امریکا اور ایران کے درمیان جاری مذاکرات کے حوالے سے غیر یقینی صورتحال برقرار ہے۔ امریکی صدر ڈونلڈ ٹرمپ نے دعویٰ کیا کہ ایران نے غیر معینہ مدت تک جوہری تنصیبات کے معائنے کی اجازت دینے پر اتفاق کیا ہے، تاہم تہران نے اس دعوے کی تردید کرتے ہوئے کہا کہ مذاکرات میں ایسی کوئی رعایت نہیں دی گئی۔

مارکیٹ میں یہ توقع بھی بڑھ رہی ہے کہ امریکی فیڈرل ریزرو رواں سال شرح سود میں تین مرتبہ اضافہ کر سکتا ہے۔ سرمایہ کار اب جمعرات کو جاری ہونے والے امریکی پرسنل کنزمپشن ایکسپنڈیچر اعدادوشمار کے منتظر ہیں، جو مہنگائی کا اہم اشاریہ تصور کیا جاتا ہے اور آئندہ مانیٹری پالیسی کے بارے میں اشارے فراہم کرے گا۔

دریں اثنا، چاندی کی قیمت 1.1 فیصد کمی کے ساتھ 61.36 ڈالر فی اونس، پلاٹینم 0.9 فیصد کمی کے بعد 1,637.34 ڈالر جبکہ پیلیڈیم 1.2 فیصد گر کر 1,223.29 ڈالر فی اونس پر آ گیا۔