وزیرِ خزانہ کے بیانیے کا تنقیدی جائزہ

اختتام پذیر مالی سال کے لیے شرحِ نمو کا تخمینہ 3.7 فیصد لگایا گیا ہے، جو بجٹ میں مقررہ 4.2 فیصد ہدف سے کم اور بھارت کی شرحِ نمو سے تقریباً 3 فیصد کم ہے۔ تاہم یہ شرح 2024-25 کے 3.2 فیصد اور 2022-23 کے 2.6 فیصد کے مقابلے میں زیادہ ہے۔ شرحِ نمو میں یہ اضافہ اس لیے اہم تھا کہ اس کی بنیاد پر استحکام پر مبنی پالیسیوں، جو جاری آئی ایم ایف پروگرام کا بنیادی ہدف ہیں، سے ترقی کے فروغ پر مبنی پالیسیوں کی جانب منتقلی کو کامیاب قرار دیا جا سکتا تھا۔

مالی استحکام کے حصول کا سہرا 29 مئی 2026 تک زرمبادلہ کے ذخائر 17.19 ارب ڈالر تک پہنچنے کو دیا گیا، جس کا حوالہ وزیرِ خزانہ نے بھی دیا۔ تاہم اکنامک سروے کے مطابق 8 مئی کو ذخائر 15.8 ارب ڈالر تھے، جبکہ اپریل کے اختتام پر یہ 14.8 ارب ڈالر ریکارڈ کیے گئے تھے۔ اسٹیٹ بینک آف پاکستان کے پاس موجود یہ ذخائر بڑی حد تک قرضوں پر مبنی ہیں، جن میں دو دوست ممالک کی جانب سے اسٹیٹ بینک میں رکھے گئے 10 ارب ڈالر سے زائد کے رول اوور شامل ہیں۔ مارچ 2026 تک مجموعی سرکاری قرضہ 83 کھرب روپے تک پہنچ گیا، جو گزشتہ سال کی اسی مدت کے مقابلے میں 3.4 فیصد زیادہ ہے۔

مالی استحکام کے لیے سخت سکڑاؤ پر مبنی مالیاتی اور مانیٹری پالیسیوں (جنہیں عمومی طور پر معاشی نمو کے لیے نقصان دہ سمجھا جاتا ہے) کا سلسلہ 2025-26 میں بھی جاری رہا۔ 2019 سے آئی ایم ایف کے تینوں پروگراموں میں یہ شرط شامل رہی ہے کہ ان پالیسیوں سے انحراف کی صورت میں پروگرام معطل کیا جا سکتا ہے۔ اطلاعات کے مطابق آئندہ مالی سال میں بھی یہ پالیسیوں کا تسلسل برقرار رہنے کا امکان ہے، کیونکہ ٹیکس وصولیوں کے بلند اہداف مقرر کیے گئے ہیں، جبکہ 15 جون کو مانیٹری پالیسی کمیٹی کے اجلاس کے پیشِ نظر پالیسی ریٹ میں بھی آئندہ پیر ہی اضافہ کیا جا سکتا ہے۔ مئی میں عمومی مہنگائی کی شرح میں 0.8 فیصد اور بنیادی مہنگائی (کور انفلیشن) میں اپریل 2026 کے مقابلے میں ایک فیصد پوائنٹ اضافہ ریکارڈ کیا گیا۔

جولائی تا اپریل 2026 کے دوران اوسط مہنگائی کی شرح بڑھ کر 6.2 فیصد ہوگئی، جو ایک سال قبل اسی عرصے میں 4.7 فیصد تھی۔ اس اضافے کی وجہ خلیجی بحران کو قرار دیا گیا، تاہم عام شہری اس کا اندازہ ہر بار بازار سے خریداری یا کسی خدمت کے حصول کے وقت خود لگا لیتے ہیں۔ دوسری جانب 18 لاکھ نئی ملازمتوں کے مواقع پیدا ہونے کا دعویٰ بلند شرحِ نمو سے منسلک کیا گیا ہے۔ بے روزگاری کی شرح 7 فیصد بتائی گئی، لیکن آزاد ماہرینِ اقتصادیات کا مؤقف ہے کہ اگر لیبر فورس سروے کو پیمانہ بنایا جائے تو یہ شرح تقریباً 22 فیصد بنتی ہے۔ سیاسی لحاظ سے حساس سمجھے جانے والے یہی دونوں اشاریے حالیہ گلگت بلتستان انتخابات میں مسلم لیگ (ن) کی کمزور انتخابی کارکردگی کی اہم وجوہات کے طور پر پیش کیے جا رہے ہیں۔

وزیرِ خزانہ نے کاروباری اداروں کی تعداد میں اضافے، ابتدائی عوامی حصص کی فروخت (آئی پی اوز) میں نمو اور فری لانسرز کی آمدن بڑھ کر 90 کروڑ ڈالر تک پہنچنے کو بھی اہم کامیابیوں میں شمار کیا، اگرچہ ان اقدامات کے اثرات ابھی تک عام عوام کی زندگیوں میں واضح طور پر نظر نہیں آتے۔ اس کے علاوہ انہوں نے چین کی مقامی سرمایہ منڈی میں پاکستان کے پہلے خودمختار پانڈا بانڈ کے اجرا کو بھی ایک بڑی کامیابی قرار دیا۔ تاہم اس بانڈ کا حجم 1.75 ارب رینمنبی ہے، جو صرف 25 کروڑ ڈالر کے مساوی بنتا ہے، اگرچہ اس پر شرحِ سود محض 2.5 فیصد ہے۔

3.7 فیصد شرحِ نمو کے تخمینے کو ماہرینِ اقتصادیات غالباً دو بنیادوں پر چیلنج کریں گے۔ پہلی وجہ یہ ہے کہ آئی ایم ایف کے ایک مشن نے پاکستان بیورو آف اسٹیٹسٹکس (پی بی ایس) کی جانب سے تکنیکی معاونت کے تحت تیار کیے جانے والے نئے پروڈیوسر پرائس انڈیکس (پی پی آئی) پر عدم اطمینان کا اظہار کیا، جس کے باعث 30 جون تک اس منصوبے کی تکمیل کی مقررہ مدت بڑھا کر اکتوبر تک کر دی گئی۔ پی پی آئی سے مراد مقامی پیداواری اداروں کو اپنی مصنوعات کی فروخت پر حاصل ہونے والی قیمتوں میں وقت کے ساتھ آنے والی اوسط تبدیلی ہے، جو معاشی و کاروباری فیصلوں اور مہنگائی کی نگرانی کے لیے ایک اہم اشاریہ تصور کیا جاتا ہے۔

دوسری وجہ یہ ہے کہ ابھی یہ واضح نہیں کہ 3.7 فیصد شرحِ نمو حقیقی پیداوار میں اضافے کا نتیجہ ہے یا ذخیرہ شدہ مال (انوینٹریز) میں کمی کا۔ اس ضمن میں یہ امر قابلِ ذکر ہے کہ 2021-22 میں اس وقت کی خان حکومت کو اس وقت خوشگوار حیرت ہوئی تھی جب شرحِ نمو کا تخمینہ 6.1 فیصد لگایا گیا، تاہم بعد میں معلوم ہوا کہ اس اضافے کی بڑی وجہ کووڈ-19 لاک ڈاؤن کے خاتمے کے بعد ذخیرہ شدہ مال کے استعمال میں اضافہ تھا، نہ کہ پیداوار میں اسی تناسب سے اضافہ۔

اس تناظر میں یہ امر قابلِ توجہ ہے کہ 2026 میں گھریلو کھپت (ہاؤس ہولڈ کنزمپشن) مجموعی قومی پیداوار (جی ڈی پی) کے 82.6 فیصد تک پہنچ گئی، جو گزشتہ سال کے 6.68 فیصد کے مقابلے میں 11.4 فیصد نمو کو ظاہر کرتی ہے۔ اسی طرح سرکاری کھپت بھی جی ڈی پی کے 9.94 فیصد تک بڑھ گئی۔ یوں 2026 میں مجموعی کھپت جی ڈی پی کے 93.57 فیصد تک جا پہنچی، جو گزشتہ سال 92.95 فیصد تھی۔ بلاشبہ یہ اضافہ مہنگائی میں اضافے کی عکاسی کرتا ہے۔ کھپت میں یہ بڑھوتری خدمات کے شعبے کی 4.1 فیصد نمو سے بھی مطابقت رکھتی ہے، جس کا سب سے بڑا جزو تھوک اور پرچون تجارت ہے، جہاں خصوصاً زرعی شعبے میں بیوپاری اور درمیانی کردار ادا کرنے والے عناصر قیمتوں کے تعین میں کلیدی کردار ادا کرتے ہیں۔

وزیرِ خزانہ نے حسبِ روایت اکنامک سروے جاری کرتے ہوئے کہا کہ اختتام پذیر مالی سال کی شرحِ نمو کا موازنہ گزشتہ برسوں سے کیا جانا چاہیے، اور اس سلسلے کا آغاز انہوں نے 2023 سے کیا۔ تاہم بظاہر وہ اس حقیقت کو نظرانداز کر گئے کہ عمران خان کی حکومت 11 اپریل 2022 کو ختم ہو گئی تھی اور موجودہ حکمران اتحاد نے اقتدار سنبھال لیا تھا۔

رپورٹ کے مطابق جولائی تا مارچ 2026 کے دوران مشروط واجبات (کنٹیجنٹ لائیبیلٹیز) کا حجم بڑھ کر 4,322 ارب روپے تک پہنچ گیا، جبکہ گزشتہ سال اسی عرصے میں یہ 3,632 ارب روپے تھا۔ اس طرح ان واجبات میں 19 فیصد کا تشویشناک اضافہ ریکارڈ کیا گیا۔

خلاصہ یہ کہ وزیرِ خزانہ کا یہ موقف کہ ملک نے اہم کامیابیاں حاصل کیں، تاہم تین بیرونی عوامل،خصوصاً مشرقِ وسطیٰ کا تنازع، ستمبر کے سیلاب اور صدر ٹرمپ کی جانب سے عائد کردہ ٹیرف،نے حکومت کے مکمل اہداف کے حصول میں رکاوٹ ڈالی، اس لیے درست ثابت نہیں ہوتا، کیونکہ ترقی کے خلاف سمجھی جانے والی پالیسیوں کا تسلسل اب بھی برقرار ہے۔

کاپی رائٹ بزنس ریکارڈر، 2026