بھارت نے 5 ہزار بنگلہ دیشی شہریوں کو حراست کے بعد ملک بدر کر دیا

بھارت کی مغربی بنگال ریاست میں حکومت کی تبدیلی کے بعد بنگلہ دیشی شہریوں کے خلاف کارروائیاں تیز کر دی گئی ہیں، اور سرکاری اعداد و شمار کے مطابق اب تک تقریباً 5 ہزار بنگلہ دیشی شہریوں کو ملک بدر کیا جا چکا ہے۔

بھارتیہ جنتا پارٹی (بی جے پی) نے گزشتہ ماہ 10 کروڑ سے زائد آبادی والی سرحدی ریاست مغربی بنگال کے انتخابات میں بھاری اکثریت سے کامیابی حاصل کی تھی۔ انتخابی مہم کے دوران پارٹی نے غیر قانونی تارکین وطن کو شناخت کرنے اور ملک بدری کا وعدہ کیا تھا۔

اقتدار سنبھالنے کے بعد نئی ریاستی حکومت نے غیر دستاویزی بنگلہ دیشی باشندوں اور میانمار سے ہجرت کر کے آنے والے روہنگیا پناہ گزینوں کے لیے حراستی مراکز قائم کرنے کا حکم دیا۔

ریاست کے وزیر اعلیٰ سوویندو ادھیکاری نے کولکتہ میں میڈیا سے گفتگو کرتے ہوئے کہا کہ مئی کے دوران ریاست کے تمام اضلاع میں ہولڈنگ سینٹرز قائم کیے گئے، جہاں سے اب تک 4,800 بنگلہ دیشی شہریوں کو سرحد پار واپس بھیجا جا چکا ہے۔

انہوں نے بتایا کہ مزید 836 افراد اس وقت حراستی مراکز میں موجود ہیں اور انہیں بھی جلد ملک بدر کرنے کے انتظامات کیے جا رہے ہیں۔

یہ کارروائیاں ایک ایسے وقت میں ہو رہی ہیں جب بھارت اور بنگلہ دیش کے تعلقات 2024 میں ڈھاکا میں سیاسی تبدیلی کے بعد کشیدہ ہو گئے تھے۔ انسانی حقوق کی تنظیمیں ماضی میں بھی بھارت پر الزام عائد کر چکی ہیں کہ وہ مناسب قانونی کارروائی کے بغیر بنگالی زبان بولنے والے مسلمانوں کو بنگلہ دیش دھکیل رہا ہے۔

دوسری جانب، بنگلہ دیش اور بھارت کی سرحدی فورسز کے سربراہان کے درمیان نئی دہلی میں ملاقات بھی متوقع ہے، جس سے دونوں ممالک کے تعلقات میں بہتری کی امید ظاہر کی جا رہی ہے۔