غنی ڈیریز نے آسٹریلیا سے مزید 300 اعلیٰ نسل کی گائے درآمد کرلیں

غنی گروپ کی ذیلی کمپنی غنی ڈیریز لمیٹڈ نے بدھ کے روز اعلان کیا کہ اس نے آسٹریلیا سے 300 اعلیٰ نسل کی گائے درآمد کرلی ہیں۔ یہ کھیپ آسٹریلوی کمپنی آسٹریلین رورل ایکسپورٹ پی ٹی وائی لمیٹڈ کی جانب سے فراہم کی گئی ہے۔

کمپنی نے اس پیش رفت سے متعلق پاکستان اسٹاک ایکسچینج کو ایک نوٹس کے ذریعے آگاہ کیا۔

نوٹس کے مطابق درآمد کی گئی بچھیاں خوشاب میں واقع کمپنی کی ڈیری سہولت پر پہنچ چکی ہیں۔

کمپنی کا کہنا ہے کہ یہ درآمد اس کے جاری توسیعی منصوبے کا حصہ ہے، جس کا مقصد دودھ کی پیداوار بڑھانا اور مجموعی ڈیری آپریشنز کو مزید مضبوط بنانا ہے۔

واضح رہے کہ اس سے قبل فروری میں بھی غنی ڈیریز نے آسٹریلیا سے 300 گائے کی پہلی کھیپ وصول کی تھی، جو ناسنا نامی سپلائر کی جانب سے فراہم کی گئی تھی۔

غنی گروپ 1959 میں قائم ہوا تھا اور وقت کے ساتھ پاکستان کے نمایاں اور متنوع کاروباری گروپس میں شمار ہونے لگا۔ گروپ نے مختلف شعبوں میں سرمایہ کاری کے ساتھ 2020 میں غنی حلال فیڈ مل اور غنی ڈیریز لمیٹڈ کا آغاز کیا، جو خام دودھ کی پیداوار اور فروخت کے کاروبار سے وابستہ ہے۔

غنی ڈیریز اپنی تمام دودھ کی پیداوار طویل المدتی معاہدوں کے تحت پاکستان کی بڑی ڈیری پروسیسنگ کمپنیوں کو فراہم کرتی ہے۔