ٹرمپ چین سے بغیر بڑی کامیابی کے روانہ، شی جن پنگ کی تعریفیں جاری

امریکی صدر ڈونلڈ ٹرمپ دو روزہ دورۂ چین کے بعد جمعہ کو بغیر کسی بڑی تجارتی پیش رفت یا ایران جنگ کے خاتمے کے لیے بیجنگ کی ٹھوس حمایت بغیر حاصل کیے واپس روانہ ہوگئے، حالانکہ انہوں نے اپنے میزبان چینی صدر شی جن پنگ کی بھرپور تعریف کی۔

ٹرمپ کا یہ دورہ 2017 کے بعد کسی بھی امریکی صدر کا پہلا دورۂ چین تھا، جس کا مقصد تجارتی کامیابیاں حاصل کرکے آئندہ وسط مدتی انتخابات سے قبل اپنی کمزور عوامی مقبولیت کو سہارا دینا تھا۔

دورے کے دوران شاندار تقاریب، فوجی پریڈ اور خفیہ باغ کی سیر جیسے مناظر دیکھنے میں آئے، تاہم بند کمرے میں ہونے والی ملاقاتوں میں شی جن پنگ نے ٹرمپ کو خبردار کیا کہ تائیوان کے معاملے میں کسی بھی غلطی سے تصادم پیدا ہوسکتا ہے۔

ٹرمپ نے اس معاملے پر تبصرہ کرنے سے گریز کیا اور زیادہ تر شی جن پنگ کی شخصیت اور میزبانی کی تعریف کرتے رہے۔

ایران کے معاملے پر چین نے واضح کیا کہ وہ امریکہ اور اسرائیل کی جنگ سے ناخوش ہے۔ چینی وزارت خارجہ نے بیان میں کہا کہ یہ تنازع کبھی شروع ہی نہیں ہونا چاہیے تھا اور نہ ہی اسے جاری رہنا چاہیے۔

اگرچہ ٹرمپ نے کہا کہ دونوں رہنماؤں نے ایران پر یکساں سوچ کا اظہار کیا، مگر چین نے ایران کے خلاف کسی عملی اقدام یا دباؤ کی یقین دہانی نہیں کرائی۔

تجارتی محاذ پر بھی کوئی بڑی پیش رفت سامنے نہ آسکی۔ ٹرمپ نے دعویٰ کیا کہ چین 200 بوئنگ طیارے خریدے گا، لیکن یہ تعداد مارکیٹ توقعات سے کم نکلی، جس کے بعد بوئنگ کے شیئرز میں 4 فیصد سے زائد کمی دیکھی گئی۔

دوسری جانب نایاب معدنیات کی فراہمی، اینویڈیا چپس کی فروخت اور ٹیرف تنازع جیسے اہم معاملات بھی حل طلب رہے۔

اس کے باوجود دونوں ممالک نے تعلقات میں استحکام کو اہم قرار دیا، جبکہ شی جن پنگ نے کہا کہ دنیا کے سب سے اہم تعلقات کو خراب نہیں ہونا چاہیے۔