امریکی عدالت کا فیصلہ : ضیا چشتی کے ٹی آر جی پاکستان کے خلاف دعوے 2022 کے تصفیہ نامے کے تحت خارج

ٹی آر جی پاکستان لمیٹڈ اور اس کے سابق سی ای او ضیا چشتی کے درمیان طویل عرصے سے جاری قانونی جنگ نے اس وقت ایک نیا رخ اختیار کر لیا جب امریکی وفاقی عدالت نے فیصلہ سنایا کہ ضیا چشتی کی جانب سے اٹھائے گئے اہم دعوے 2022 میں طے پانے والے ایک تصفیہ نامے کے تحت پہلے ہی ختم ہو چکے ہیں۔

جمعرات کو پاکستان اسٹاک ایکسچینج کو بھیجے گئے ایک نوٹس میں ٹی آر جی پاکستان نے بتایا کہ ریاست ہائے متحدہ کی ڈسٹرکٹ کورٹ برائے سدرن ڈسٹرکٹ آف نیویارک (ایس ڈی این وائی) نے حکم دیا ہے کہ کمپنی اور اس کے ملحقہ اداروں کے خلاف ضیا چشتی کے وہ تمام دعوے جو 10 جنوری 2022 کے معاہدے سے قبل کے اقدامات سے متعلق ہیں مستقل طور پر ختم ہو چکے ہیں اور کسی بھی فورم پر ان کی سماعت نہیں کی جا سکتی۔

ٹی آر جی پاکستان کے مطابق ان دعووں میں ضیا چشتی کا وہ موقف بھی شامل ہے جس میں انہوں نے کمپنی اور اس کے ملحقہ اداروں پر بطور شیئر ہولڈر ان کا استحصال کرنے کا الزام لگایا تھا۔ کمپنی نے مزید بتایا کہ ضیا چشتی نے اس تصفیہ نامے پر اس وقت دستخط کیے تھے جب انہوں نے 2022 میں ایک ٹرانزیکشن کے نتیجے میں ٹی آر جی انٹرنیشنل سے 60 ملین ڈالر سے زائد کی رقم وصول کی تھی۔

واضح رہے کہ تصفیہ نامہ ایک ایسی قانونی دستاویز ہے جس کے تحت ایک فریق معاوضے یا سمجھوتے کے بدلے دوسرے فریق کے خلاف قانونی کارروائی نہ کرنے پر اتفاق کرتا ہے۔

کمپنی کا کہنا ہے کہ امریکی عدالت کے زیرِ بحث بہت سے دعوے ان قانونی کارروائیوں کی بنیاد بھی تھے جو ضیا چشتی نے سندھ ہائی کورٹ سمیت مختلف فورمز پر کمپنی کے خلاف شروع کر رکھی تھیں۔

ضیا چشتی نے نومبر 2021 میں امریکی کانگریس کی سماعت کے دوران جنسی ہراسانی اور حملے کے الزامات کے بعد ٹی آر جی سے استعفیٰ دے دیا تھا۔ استعفیٰ کے بعد سے وہ کمپنی کا کنٹرول دوبارہ حاصل کرنے کی کوشش کر رہے ہیں، تاہم موجودہ مینجمنٹ کا موقف ہے کہ ان کی واپسی سے کمپنی کی ساکھ اور اثاثوں کی قدر کو ناقابل تلافی نقصان پہنچے گا۔

ٹی آر جی کے کنٹرول کے لیے جاری یہ طویل لڑائی پاکستان کے کارپوریٹ طرزِ حکمرانی کے بڑے تنازعات میں سے ایک بن کر ابھری ہے۔ چند روز قبل پاکستان کی سپریم کورٹ نے نچلی عدالت کے اس فیصلے کے خلاف اپیلیں مسترد کر دی تھیں جس میں گرین ٹری ہولڈنگز کے 30 فیصد حصص منسوخ کر دیے گئے تھے۔ اس فیصلے کے بعد ٹی آر جی انٹرنیشنل نے خبردار کیا تھا کہ ضیا چشتی سے کسی بھی قسم کی وابستگی کمپنی کے لیے سنگین ساکھ، گورننس اور تجارتی خطرات کا باعث بن سکتی ہے۔