روس اب دن کے وقت بھی بڑے حملہ کررہا ہے، زیلنسکی

یوکرینی صدر وولودیمیر زیلنسکی نے بدھ کے روز خبردار کیا ہے کہ روس کی جانب سے ڈرون حملوں کی نئی لہریں متوقع ہیں، اور اس وقت یوکرین کی فضائی حدود میں 100 سے زائد ڈرون موجود ہیں۔ ان کے مطابق ماسکو نے اپنی حکمت عملی تبدیل کرتے ہوئے اب دن کے اوقات میں بھی بڑے پیمانے پر حملے شروع کر دیے ہیں۔

زیلنسکی نے سوشل میڈیا پلیٹ فارم ایکس پر اپنے بیان میں کہا کہ روس جان بوجھ کر یوکرین کے ریلوے انفرااسٹرکچر اور شہری علاقوں کو نشانہ بنا رہا ہے۔ انہوں نے کہا کہ یہ حملے شہری زندگی کو متاثر کرنے کے لیے کیے جا رہے ہیں۔

یوکرینی فضائیہ کے مطابق منگل کی شام 6 بجے سے روس نے 139 ڈرونز کے ذریعے حملہ کیا، جن میں سے 111 کو مار گرایا گیا یا ناکارہ بنا دیا گیا۔

روس عام طور پر رات کے وقت بڑے حملے کرتا رہا ہے، تاہم حالیہ ہفتوں میں دن کے وقت بھی ڈرون اور میزائل حملوں میں اضافہ دیکھا گیا ہے، جس سے شہری زندگی میں مزید خلل پیدا ہو رہا ہے۔

زیلنسکی نے عالمی برادری سے اپیل کی کہ وہ یوکرین کی حمایت جاری رکھے اور روسی جارحیت پر خاموش نہ رہے۔ روس شہریوں کو نشانہ بنانے کی تردید کرتا ہے تاہم یوکرین اس کے برعکس دعویٰ کرتا ہے۔