وزیراعظم کا بورڈ آف انویسٹمنٹ اور ایس آئی ایف سی کے انضمام کا حکم

وزیراعظم نے بورڈ آف انویسٹمنٹ (بی او آئی) اور اسپیشل انویسٹمنٹ فسیلیٹیشن کونسل (ایس آئی ایف سی) کے انضمام کو تیز کرنے کا حکم دے دیا ہے۔ اس نئے ڈھانچے کے تحت ایس آئی ایف سی کو براہ راست غیر ملکی سرمایہ کاری (ایف ڈی آئی) کو راغب کرنے کے حکومتی ایجنڈے کی قیادت سونپی جائے گی۔

ذرائع کے مطابق یہ انضمام وزیراعظم کے 23 مئی کو ہونے والے اعلیٰ سطح دورۂ چین سے قبل مکمل کرنے کا منصوبہ ہے۔

ایس آئی ایف سی کو یہ بھی ذمہ داری دی گئی ہے کہ وہ سرمایہ کاری کے فروغ کے لیے ایک جامع روڈ میپ پیش کرے، جس میں اسپیشل اکنامک زونز (ایس ای زیڈز) کی صورتحال، قانونی فریم ورک، ریگولیٹری اصلاحات، بزنس فیسیلیٹیشن سینٹر اور غیر ملکی سرمایہ کاری (فروغ و تحفظ) ایکٹ 2022 کے نفاذ جیسے امور شامل ہوں۔

بزنس ریکارڈر سے گفتگو کرتے ہوئے وزیر سرمایہ کاری قیصر احمد شیخ نے تصدیق کی کہ بورڈ آف انویسٹمنٹ اور ایس آئی ایف سی کے انضمام کا عمل آئی ایم ایف کے مشاہدات کے مطابق کیا جا رہا ہے۔

یہ اقدام آئی ایم ایف کی گورننس اینڈ کرپشن ڈائیگنوسٹک اسیسمنٹ (جی سی ڈی اے) کی سفارشات کے بعد سامنے آیا ہے، جو 19 نومبر 2025 کو جاری کی گئی تھی، جس میں ایس آئی ایف سی کے تمام فیصلوں، مراعات اور مستفید ہونے والوں کی سالانہ رپورٹ میں مکمل شفافیت اور عوامی انکشاف کی ہدایت کی گئی تھی۔

حکومت نے چین کے ساتھ سی پیک فیز-ٹو کے تحت دوسرے سرکاری دورے کی بھی تیاری مکمل کر لی ہے۔ پہلے مرحلے کے برعکس، جو زیادہ تر حکومت سے حکومت (جی ٹو جی) تعاون پر مبنی تھا، یہ نیا مرحلہ بزنس ٹو بزنس (بی ٹو بی) تعاون کو فروغ دینے پر مرکوز ہوگا۔

وزیر سرمایہ کاری کے مطابق متعدد چینی کمپنیوں نے پاکستان کے اسپیشل اکنامک زونز میں سرمایہ کاری میں گہری دلچسپی ظاہر کی ہے، جہاں انہیں 9 سالہ ٹیکس چھوٹ سمیت پرکشش مراعات حاصل ہیں۔ انہوں نے کہا کہ پاکستان آئی ایم ایف پروگرام کے تحت واحد ملک ہے جو سرمایہ کاروں کو اس نوعیت کی بڑی ٹیکس مراعات فراہم کرتا ہے۔

ستمبر 2025 میں سی پیک فیز ٹو کا باقاعدہ آغاز ایکشن پلان ٹو فیوسٹر این ایون کلوزر چائنا پاکستان کمیونٹی ود اے شیئرڈ فیوچر (2025-2029) کے تحت کیا گیا تھا۔

وزیر سرمایہ کاری نے ایف ڈی آئی میں حالیہ کمی کی وجہ آئی ایم ایف پروگرام کی شرائط اور بھارت کی جانب سے منفی پروپیگنڈے کو قرار دیا۔

کاپی رائٹ بزنس ریکارڈر، 2026