پاکستان اور چین کے وزرائے خارجہ کی ملاقات، ہرمز کے پانیوں میں آزادانہ آمد و رفت پر زور

نائب وزیر اعظم اور وزیر خارجہ محمد اسحاق ڈار نے منگل کے روز چین کے وزیر خارجہ وانگ یی سے ٹیلیفون پر بات چیت کی، جس میں خطے میں حالیہ پیش رفت اور امن و استحکام کے فروغ کے لیے کی جانے والی کوششوں پر غور کیا گیا ہے۔

دفتر خارجہ کے مطابق دونوں رہنماؤں نے پاکستان کی جاری ثالثی کوششوں کے حوالے سے ایران اور امریکہ کے درمیان تعلقات کو سہولت فراہم کرنے کی کاوشوں پر اپنے خیالات کا تبادلہ کیا۔

دفتر خارجہ کے مطابق بات چیت کے دوران چین کے وزیر خارجہ وانگ یی نے پاکستان کے ”تعمیراتی ثالثی کردار“ کو سراہا اور اس کی حمایت کی، جو خطے میں کشیدگی کو کم کرنے اور بات چیت کو فروغ دینے کے لیے اہم ہے۔

پاکستان اور چین کے وزرائے خارجہ نے خطے میں امن، ہرمز کے پانیوں میں آزادانہ آمد و رفت اور باہمی تعاون پر زور دیا۔

دفتر خارجہ کے بیان کے مطابق، دونوں فریقین نے خطے میں بدلتے ہوئے حالات کے پیش نظر ایک پائیدار جنگ بندی برقرار رکھنے اور آبنائے ہرمز کے ذریعے معمول کی آمد و رفت کو یقینی بنانے کی اہمیت پر زور دیا۔

وزرائے خارجہ نے اعلیٰ سطح کے تبادلوں، پاکستان اور چین کے درمیان سفارتی تعلقات کی 75ویں سالگرہ کے موقع پر منصوبہ بندی کی سرگرمیوں اور وسیع تر دوطرفہ و کثیرالجہتی تعاون پر بھی بات کی۔

بیان میں کہا گیا ہے کہ دونوں فریقین نے تمام باہمی دلچسپی کے امور پر قریبی رابطہ برقرار رکھنے پر اتفاق کیا۔