امریکہ ایران جنگ خاتمے کے قریب، مختصر مفاہمتی یادداشت پر اتفاق کا امکان

امریکی میڈیا رپورٹ کے مطابق وائٹ ہاؤس کو امید ہے کہ امریکہ ایران کے ساتھ جنگ کے خاتمے اور آئندہ جوہری مذاکرات کے فریم ورک کے لیے ایک مختصر مفاہمتی یادداشت (ایم او یو) پر اتفاق کے قریب پہنچ گیا ہے۔ یہ رپورٹ ایکسایوس نے بدھ کے روز امریکی حکام اور باخبر ذرائع کے حوالے سے شائع کی۔

رپورٹ کے مطابق امریکہ آئندہ 48 گھنٹوں میں ایران کی جانب سے چند اہم نکات پر جواب کا منتظر ہے۔ اگرچہ ابھی کوئی حتمی معاہدہ طے نہیں پایا، تاہم فریقین جنگ کے آغاز کے بعد پہلی بار کسی ممکنہ سمجھوتے کے قریب دکھائی دیتے ہیں۔

مجوزہ 14 نکاتی ایک صفحے پر مشتمل مفاہمتی یادداشت کے تحت ایران جوہری افزودگی عارضی طور پر روکنے پر آمادہ ہوگا، جبکہ امریکہ پابندیاں نرم کرنے اور ایران کے منجمد فنڈز میں سے اربوں ڈالر جاری کرنے پر غور کرے گا۔ اس کے علاوہ آبنائے ہرمز میں بحری آمدورفت سے متعلق پابندیاں بھی بتدریج ختم کی جائیں گی۔

رپورٹ کے مطابق یہ مذاکرات امریکی نمائندوں اسٹیو وٹکوف اور جیرڈ کشنر اور ایرانی حکام کے درمیان براہِ راست اور ثالثوں کے ذریعے جاری ہیں۔ مجوزہ فریم ورک کے تحت معاہدے کے بعد 30 روزہ مذاکراتی دور شروع ہوگا جس میں تفصیلی معاہدہ طے کیا جائے گا، جس میں ایران کے جوہری پروگرام کی حدود، پابندیوں کا خاتمہ اور آبنائے ہرمز کو کھولنے کے اقدامات شامل ہوں گے۔

ایک امریکی عہدیدار کے مطابق اس دوران ایران کی جانب سے شپنگ پر عائد پابندیاں اور امریکہ کی بحری ناکہ بندی مرحلہ وار ختم کی جائے گی، تاہم مذاکرات ناکام ہونے کی صورت میں امریکہ دوبارہ ناکہ بندی یا فوجی کارروائی بحال کر سکتا ہے۔

ادھر ایران نے کہا ہے کہ وہ صرف منصفانہ امن معاہدہ قبول کرے گا۔ یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ نے حال ہی میں آبنائے ہرمز میں بحری آپریشن عارضی طور پر روک دیا تھا۔

تاہم رائٹرز اس رپورٹ کی فوری طور پر تصدیق نہیں کر سکا، جبکہ امریکی محکمہ خارجہ اور وائٹ ہاؤس نے بھی اس پر فوری ردعمل نہیں دیا۔