غزہ میں اسرائیلی حملوں میں 4 فلسطینی شہید

غزہ کی پٹی میں اتوار کے روز اسرائیلی فوجی کارروائیوں میں کم از کم چار فلسطینی شہید ہو گئے، فلسطینی حکام نے تصدیق کی ہے کہ یہ واقعات ایسے وقت میں پیش آئے جب اکتوبر 2025 میں ہونے والی جنگ بندی کے باوجود علاقے میں تشدد کا سلسلہ جاری ہے۔

طبی ذرائع کے مطابق وسطی غزہ کے علاقے المغراقة کے قریب اسرائیلی فضائی حملے میں ایک شخص جان کی بازی ہار گیا۔ اسی طرح غزہ سٹی کے قریب اسرائیلی فائرنگ اور ٹینک شیلنگ کے نتیجے میں دو مزید افراد شہید ہوئے۔

ایک الگ واقعے میں جنوبی شہر خان یونس میں 40 سالہ ایک خاتون کو اسرائیلی فوج نے گولی مار کر قتل کر دیا۔

اسرائیلی فوج نے کہا ہے کہ اسے اتوار کے روز اس مخصوص علاقے میں اپنی کسی کارروائی کا علم نہیں ہے، تاہم دیگر واقعات کی تحقیقات جاری ہیں۔ فوج نے یہ بھی دعویٰ کیا ہے کہ اس نے جمعہ سے اب تک غزہ میں حماس کے متعدد جنگجوؤں کو نشانہ بنایا ہے۔

جنگ بندی کے باوجود غزہ میں تشدد جاری ہے اور تقریباً روزانہ کی بنیاد پر حملے رپورٹ ہو رہے ہیں۔ مقامی طبی حکام کے مطابق جنگ بندی کے بعد اب تک 800 سے زائد فلسطینی شہید ہو چکے ہیں، جبکہ اسرائیل کا کہنا ہے کہ اسی عرصے میں اس کے چار فوجی ہلاک ہوئے ہیں۔