نائب وزیراعظم اسحاق ڈار کا موجودہ مسائل کے حل کے لیے مذاکرات پر زور

نائب وزیراعظم و وزیر خارجہ سینیٹر محمد اسحاق ڈار نے اتوار کو ایران کے وزیر خارجہ عباس عراقچی سے ٹیلیفون پر گفتگو کی۔

وزارت خارجہ کے ترجمان کے دفتر سے جاری بیان کے مطابق گفتگو کے دوران نائب وزیراعظم و وزیر خارجہ نے اس بات پر زور دیا کہ موجودہ مسائل کے جلد حل کے لیے مسلسل مکالمہ اور رابطہ نہایت ضروری ہے تاکہ خطے اور اس سے باہر امن و استحکام کو فروغ دیا جا سکے۔

دونوں رہنماؤں نے باہمی رابطے میں رہنے پر اتفاق کیا۔

علاوہ ازیں پاکستان اور مصر نے خطے اور اس سے باہر پائیدار امن کے قیام کے لیے ایران اور امریکہ کے درمیان مذاکرات کے اگلے مرحلے کی کامیابی کے لیے امید کا اظہار کیا ہے۔

یہ گفتگو نائب وزیراعظم و وزیر خارجہ اسحاق ڈار اور مصر کے وزیر خارجہ بدر عبدالعاطی کے درمیان ٹیلیفونک رابطے کے دوران ہوئی۔

گفتگو کے دوران انہوں نے خطے کی صورتحال بشمول غزہ کی پٹی کی صورتحال میں ہونے والی اہم پیشرفت پر تبادلہ خیال کیا۔

نائب وزیراعظم نے تمام مسائل کے حل کے لیے مذاکرات اور سفارت کاری کی اہمیت پر زور دیا اور امن و استحکام اور تعمیری روابط کے فروغ کے لیے پاکستان کے عزم کا اعادہ کیا۔

دونوں رہنماؤں نے مستقل رابطے میں رہنے پر بھی اتفاق کیا۔