پاک ٹیلی کام موبائل لمیٹڈ فائیو جی نیلامی میں حصہ لینے کے لیے اہل قرار

پاکستان ٹیلی کمیونیکیشن اتھارٹی (پی ٹی اے) نے پاک ٹیلی کام موبائل لمیٹڈ (پی ٹی ایم ایل) کو جو کہ پاکستان ٹیلی کمیونیکیشن کمپنی لمیٹڈ (پی ٹی سی ایل) کی مکمل ملکیتی ذیلی کمپنی ہے، نیکسٹ جنریشن موبائل سروسز (این جی ایم ایس) یعنی فائیوجی کے اسپیکٹرم کی نیلامی میں شرکت کے لیے اہل قرار دے دیا ہے۔

پی ٹی سی ایل نے پیر کو پاکستان اسٹاک ایکسچینج کو بھیجے گئے ایک نوٹس میں اس پیشرفت سے آگاہ کیا۔

نوٹس میں کہا گیا ہے کہ کسی بھی (مزید) پیش رفت کی صورت میں، مروجہ قوانین کے مطابق پاکستان اسٹاک ایکسچینج کو مطلع کر دیا جائے گا۔

پاکستان میں فائیو جی اسپیکٹرم کی طویل عرصے سے منتظر نیلامی 10 مارچ 2026 کو منعقد ہوگی۔ بڑی ٹیلی کام کمپنیوں نے ایڈوانس شرکت کی فیس کے طور پر پہلے ہی 45 ملین امریکی ڈالر جمع کروا دیے ہیں، جو نیکسٹ جنریشن موبائل سروسز (فائیو جی) کے آغاز میں صنعت کی گہری دلچسپی کی عکاسی کرتا ہے۔

انفارمیشن ٹیکنالوجی اور ٹیلی کمیونیکیشن کے بارے میں قومی اسمبلی کی قائمہ کمیٹی کا اجلاس سید امین الحق (ایم این اے) کی سربراہی میں منعقد ہوا۔ اجلاس میں کمیٹی کو مطلع کیا گیا کہ جاز ، یوفون اور زونگ میں سے ہر ایک نے 15 ملین ڈالر جمع کروا دیے ہیں جبکہ نیلامی میں متعدد اسپیکٹرم بینڈز پیش کیے جائیں گے۔

نیلامی کے فریم ورک کے تحت ہر کامیاب بولی دہندہ کے لیے کم از کم 100 میگا ہرٹز اسپیکٹرم حاصل کرنا لازمی ہوگا جبکہ ابتدائی طور پر 5G سروسز کا آغاز ملک کے منتخب شہروں میں کیا جائے گا۔