پینٹاگون نے ایران جنگ میں ہلاک مزید دو امریکی فوجیوں کی شناخت ظاہر کر دی

امریکی محکمہ دفاع پینٹاگون نے ایران کے خلاف جاری جنگ میں ہلاک ہونے والے مزید 2 فوجیوں کی شناخت ظاہر کر دی ہے۔ یہ فوجی اتوار کے روز کویت میں امریکی فوجی تنصیب پر ہونے والے ڈرون حملے میں مارے گئے تھے جس میں مجموعی طور پر 6 ریزرو فوجی ہلاک ہوئے تھے۔

پینٹاگون کے مطابق حملے میں ہلاک ہونے والوں میں 45 سالہ میجر جیفری اوبرائن شامل ہیں جو امریکی ریاست آئیووا کے رہائشی تھے۔ اس کے علاوہ 54 سالہ چیف وارنٹ آفیسر 3 رابرٹ ایم مارزن کی ہلاکت کا بھی امکان ظاہر کیا گیا ہے۔ پینٹاگون کا کہنا ہے کہ مارزن کی حتمی شناخت میڈیکل ایگزامینر کی جانب سے مکمل کی جائے گی۔

دونوں فوجی 103rd سسٹینمنٹ کمانڈ سے وابستہ تھے جس کا ہیڈکوارٹر ڈیس موئنز، آئیووا میں ہے۔ یہ کمانڈ امریکی فوج کے عالمی لاجسٹکس اور سپلائی آپریشن کا حصہ سمجھی جاتی ہے۔

اس سے ایک روز قبل امریکی فوج نے اسی ڈرون حملے میں ہلاک ہونے والے مزید 4 فوجیوں کی شناخت ظاہر کی تھی۔ ان میں کیپٹن کوڈی اے کھورک، سارجنٹ فرسٹ کلاس نوح ایل ٹیٹجینس، سارجنٹ فرسٹ کلاس نکول ایم امور اور سارجنٹ ڈیکلن جے کوڈی شامل ہیں۔ یہ حملہ ایران کے خلاف جنگ میں امریکی فوج کی پہلی ہلاکتوں میں شمار کیا جا رہا ہے۔

ادھر امریکی وزیر دفاع پیٹ ہیگستھ نے کہا ہے کہ امریکہ اس جنگ کو طویل عرصے تک جاری رکھنے کی صلاحیت رکھتا ہے اور ضرورت پڑنے تک یہ کارروائیاں جاری رکھی جا سکتی ہیں۔