اویس لغاری نے توانائی سیکٹر کے ڈیٹا تک عوامی رسائی کی ہدایت کردی
- توانائی کے شعبے کا ڈیٹا عوام، محققین، توانائی کے ماہرین اور طلبہ کے لیے دستیاب بنایا جائے، وزیر توانائی
وفاقی وزیر برائے توانائی سردار اویس احمد خان لغاری نے شفافیت کے فروغ اور باخبر پالیسی سازی کی حمایت کے لیے توانائی کے شعبے سے متعلق ڈیٹا عوام کے لیے قابلِ رسائی بنانے کی ہدایت کی ہے۔
وزارتِ توانائی نے جمعے کے روز جاری بیان میں اس پیش رفت سے آگاہ کیا۔
بیان کے مطابق وفاقی وزیر برائے توانائی سردار اویس احمد خان لغاری نے شفافیت اور موثر پالیسی سازی کے فروغ کی جانب ایک اہم قدم اٹھاتے ہوئے ہدایت کی ہے کہ توانائی کے شعبے کا ڈیٹا عوام، محققین، توانائی کے ماہرین اور طلبہ کے لیے دستیاب بنایا جائے۔
وزیر توانائی نے زور دیا کہ قابلِ اعتماد اور درست ڈیٹا تک کھلی رسائی سے تمام متعلقہ فریقین کو بجلی کے شعبے میں بہتری کے لیے تعمیری اور بامعنی تجاویز پیش کرنے میں مدد ملے گی۔
انہوں نے مزید کہا کہ ڈیٹا کی آسان اور بروقت دستیابی سے احتساب کے عمل کو تقویت ملے گی اور توانائی کے شعبے پر عوامی اعتماد میں اضافہ ہوگا۔ ان کے مطابق اس اقدام سے قیاس آرائیوں، غلط معلومات اور بجلی کے شعبے سے متعلق غلط یا نامکمل اعداد و شمار پر مبنی خبروں کی حوصلہ شکنی ہوگی۔
واضح رہے کہ گزشتہ ہفتے سردار اویس احمد خان لغاری نے بتایا تھا کہ وزیراعظم شہباز شریف کی جانب سے اعلان کردہ خصوصی ریلیف پیکج کے تحت صنعتی صارفین کے لیے بجلی کے نرخوں میں فی یونٹ 4.04 روپے کمی کی گئی ہے۔
Comments
Comments are closed.