لیسکو کا مجاز سرمایہ 300 فیصد بڑھا کر 200 ارب روپے کرنے کا فیصلہ

چیئرمین لیسکو بورڈ کے قریبی ذرائع نے بزنس ریکارڈر کو بتایا کہ لاہور الیکٹرک سپلائی کمپنی (لیسکو) نے اپنے مجاز سرمایہ کو 300 فیصد بڑھا کر 50 ارب روپے سے 200 ارب روپے کرنے کا فیصلہ کیا ہے۔

اس حوالے سے، معمول کے کاروبار کے علاوہ کمپنی کی جنرل باڈی 6 فروری 2026 کو ہونے والی سالانہ جنرل میٹنگ (اے جی ایم) میں لیسکو کے مجاز شیئر کیپٹل میں اضافہ کرنے کے خصوصی معاملے پر غور کرے گی۔ تجویز کردہ سرمایہ کو 20 ارب عام شیئرز میں تقسیم کیا جائے گا، ہر شیئر کی مالیت 10 روپے ہوگی، اور اس پر کمپنی خصوصی قرارداد کے ذریعے حقوق، مراعات، شرائط یا پابندیاں عائد کر سکتی ہے، جیسا کہ قانون کے تحت ممکن ہے۔

کمپنی کے مطابق، مجاز سرمایہ میں اضافہ اس لیے ضروری قرار دیا گیا ہے تاکہ لیسکو میں حکومت پاکستان کے حصص میں اضافہ کیا جا سکے، کیونکہ 30 جون 2025 تک شیئرز کے لیے موجودہ ڈپازٹ 149.51 ارب روپے تک پہنچ چکا ہے۔ اس اضافے کے بعد کمپنی کے میمورنڈم آف ایسوسی ایشن کی شق V کو تبدیل کر کے نئے مجاز شیئر کیپٹل کو ظاہر کیا جائیگا۔

تبدیل شدہ شق کے مطابق، کمپنی کا مجاز شیئر کیپٹل 200 ارب روپے ہوگا، جسے 20 ارب عام شیئرز میں تقسیم کیا جائے گا۔ کمپنی کو یہ اختیار حاصل ہوگا کہ وہ سرمایہ بڑھائے یا کم کرے، شیئرز کو مختلف کلاسز میں تقسیم کرے اور حقوق، مراعات یا شرائط میں تبدیلی کرے، جیسا کہ متعلقہ قوانین اجازت دیتے ہیں۔ مختلف کلاسز کے شیئرز کے حقوق، جیسے منافع، ووٹنگ اور دیگر فوائد، ادا شدہ قیمت کے تناسب سے ہوں گے۔

673,800,863 شیئرز جو صدر پاکستان کے نام پر رجسٹرڈ ہیں، کے ووٹنگ حقوق کے لیے لیسکو نے آرٹیکل 45 کے تحت پراکسی حاصل کرنے کی درخواست کی ہے۔ پراکسی یا تو لیسکو کے چیف ایگزیکٹو آفیسر محمد رمضان یا بورڈ کے چیئرمین عامر ضیا کو دی جائے گی۔

چیف ایگزیکٹو آفیسر اور کمپنی سیکرٹری کو مشترکہ اور علیحدہ طور پر تمام ضروری اقدامات کرنے، متعلقہ دستاویزات پر دستخط کرنے، اور ایس ای سی پی اور رجسٹرار آف کمپنیز میں قانونی اور کارپوریٹ کارروائیاں مکمل کرنے کا اختیار دیا گیا ہے تاکہ قراردادیں نافذ ہو سکیں۔

ذرائع کے مطابق، پچھلے سال شیئرز کے لیے ڈپازٹ 103.63 ارب روپے تھا، جبکہ 30 جون 2025 تک حکومت کی سرمایہ کاری اور ایڈجسٹمنٹس کے بعد یہ رقم 149.51 ارب روپے تک پہنچ گئی ہے۔

کاپی رائٹ بزنس ریکارڈر، 2026