ٹرمپ کی وائٹ ہائوس واپسی کو ایک سال مکمل، اختیارات کا لامحدود استعمال جاری رہا

صدر ڈونلڈ ٹرمپ نے منگل کو وائٹ ہاؤس میں اپنا پہلا سال مکمل کرلیا، جہاں انہوں نے ایک سال کے دوران غیر معمولی پالیسی اقدامات کے ذریعے صدارتی اختیارات میں اضافہ کیا اور امریکہ کے عالمی تعلقات کو نئے سرے سے تشکیل دیا۔ دوسرے سال میں داخل ہوتے ہوئے ٹرمپ زیادہ آزاد محسوس ہو رہے ہیں اور ایسی پالیسیز پر عمل پیرا ہیں جن سے ملک میں تقسیم اور گہری ہوئی ہے۔

حالیہ ہفتوں میں ٹرمپ نے منی سوٹا میں غیر قانونی امیگریشن کے خلاف وفاقی کارروائی کی، جس کے دوران ایک غیر مسلح خاتون کی فائرنگ سے موت ہوئی، وینیزویلا میں صدر نکولاس مادورو
کو گرفتار کرنے کے لیے فوجی چھاپہ مارا، گرین لینڈ پر قبضے کا متنازعہ منصوبہ دوبارہ شروع کیا، ایران پر حملے کی دھمکی دی، اور فیڈرل ریزرو کے چیئرمین جیروم پاول کیخلاف تحقیقات پر کوئی تشویش ظاہر نہیں کی۔

ٹرمپ نے روئٹرز کو بتایا کہ غیر ملکی فوجی کارروائیوں پر ان کی واحد حد میری اپنی اخلاقیات ہے۔ وائٹ ہاؤس کی ترجمان انا کیلی نے کہا کہ ٹرمپ کا پہلا ردعمل سفارتکاری ہوتا ہے، مگر وہ ہر آپشن کھلا رکھتے ہیں اور دونوں ممالک کے ساتھ مذاکرات ناکام ہونے پر سخت اقدامات کیے۔

20 جنوری 2025 کو ٹرمپ نے وائٹ ہاؤس میں دوسری مدت کے آغاز پر معیشت، وفاقی بیوروکریسی، امیگریشن پالیسی اور امریکی ثقافت میں تبدیلی کا وعدہ کیا تھا، اور کافی حد تک اپنی ایجنڈا پر عمل کرچکے ہیں، جس سے وہ جدید امریکی تاریخ کے سب سے بااختیار صدور میں شامل ہو گئے ہیں۔

ٹرمپ کی مقبولیت میں کمی آئی ہے اور روئٹرز/آئیپساس پول کے مطابق 41 فیصد امریکی ان کی کارکردگی سے مطمئن ہیں، جبکہ 58 فیصد ناپسندیدگی کا اظہار کر رہے ہیں۔ ڈیموکریٹک ماہر الیکس فلائیڈ نے کہا کہ ٹرمپ کے قوانین اور چیکس اینڈ بیلنس کی خلاف ورزی امریکی سلامتی کے لیے نقصان دہ ہے۔

ٹرمپ نے یہ بھی تسلیم کیا کہ نومبر کے انتخابات میں ریپبلکن پارٹی کانگریس پر کنٹرول کھو سکتی ہے، تاہم ان کے حامی ابھی بھی مضبوط ہیں اور وہ معیشت کی مضبوطی کا دعویٰ کر رہے ہیں، باوجود اس کے کہ مہنگائی بلند سطح پر برقرار ہے۔