ایف بی آر کا بڑا ایکشن، شاہانہ طرزِ زندگی دکھانے والے ٹیکس چور اب ریڈار پر

فیڈرل بورڈ آف ریونیو (ایف بی آر) نے باضابطہ طور پر اعلان کیا ہے کہ وہ ان ہزاروں افراد کے خلاف کارروائی کرے گا جو ڈیجیٹل پلیٹ فارمز (سوشل میڈیا) پر اپنی دولت اور اخراجات کی نمائش تو کرتے ہیں لیکن ٹیکس چوری میں ملوث ہیں یا اپنی آمدنی اور اثاثوں کو چھپاتے ہیں۔

ایف بی آر کے بدھ کو جاری کردہ ایک اعلان کے مطابق لائف اسٹائل مانیٹرنگ سیل جو کہ ایف بی آر کے ڈائریکٹوریٹ جنرل آف انٹیلی جنس اینڈ انویسٹی گیشن-ان لینڈ ریونیو کے تحت قائم کیا گیا ہے، ایک مخصوص یونٹ کے طور پر کام کرتا ہے۔ اس یونٹ کا بنیادی مقصد ٹیکس کی تعمیل کو مضبوط بنانا اور ٹیکس چوری کی روک تھام کرنا ہے۔

یہ سیل ڈیجیٹل پلیٹ فارمز پر دولت اور اخراجات کی عوامی سطح پر کی جانے والی نمائش کی باقاعدہ نگرانی کے لیے مصنوعی ذہانت (اے آئی) اور سوشل میڈیا انٹیلی جنس سمیت جدید تجزیاتی تکنیکوں کا استعمال کرتا ہے۔

مشاہدہ کیے گئے طرزِ زندگی، اثاثوں اور اخراجات کے نمونوں کا اعلان کردہ آمدنی اور دولت کے ساتھ سخت کراس ویریفکیشن (تقابلی جانچ) کے ذریعے، یہ سیل انکم ٹیکس گوشواروں اور ڈیجیٹل پلیٹ فارمز پر عوامی طور پر نظر آنے والی خوشحالی کے اشاروں کے درمیان نمایاں فرق کی نشاندہی کرتا ہے۔

ایف بی آر نے مزید کہا کہ یہ اقدام ٹیکس نیٹ کو وسعت دینے، ریونیو اہداف حاصل کرنے اور معاشرے کے تمام طبقات میں منصفانہ اور شفاف ٹیکس نظام کو فروغ دینے کے لیے ایف بی آر کی اسٹریٹجک کوششوں کا ایک اہم حصہ ہے۔