یوکرینی ڈرون حملے سے روس کے روستوف آن دون میں صنعتی تنصیبات میں آگ لگ گئی

یوکرین کے ایک ڈرون حملے کے نتیجے میں روس کے جنوبی شہر روستوف آن دون میں بدھ کی علی الصبح صنعتی تنصیب میں دو مقامات پر آگ بھڑک اٹھی، جس کے باعث چار افراد زخمی ہوگئے جبکہ متعدد رہائشی عمارتوں کو نقصان پہنچا۔ علاقائی حکام کے مطابق حملے کے بعد شہر کے مختلف علاقوں میں ملبے تلے دب کر ایک چار سالہ بچے سمیت چار افراد زخمی ہوئے۔ تمام زخمیوں کو فوری طور پر اسپتال منتقل کردیا گیا ہے جہاں ان کا علاج جاری ہے۔

روسٹوف ریجن کے گورنر یوری سلیوسر نے اپنے بیان میں کہا کہ ڈرونز کو فضا ہی میں مار گرایا گیا، تاہم ان کے ملبے نے رہائشی عمارتوں کو شدید متاثر کیا۔ انہوں نے بتایا کہ صنعتی مقام پر لگی آگ سے متعلق تفصیلات فی الحال ظاہر نہیں کی جا سکتیں۔ گورنر کے مطابق ایک مقام پر آگ پر قابو پا لیا گیا ہے جبکہ دوسرے مقام پر اسے محدود کردیا گیا ہے اور آگ بجھانے کا کام عارضی طور پر جاری ہے۔

یوکرین کی جانب سے اس حملے پر کسی قسم کا بیان سامنے نہیں آیا۔ تاہم یوکرین ماضی میں اس بات کا دعویٰ کرتا رہا ہے کہ روس کے اندر ڈرون حملے ماسکو کی فوجی صلاحیت کم کرنے اور توانائی کے ڈھانچے کو متاثر کرنے کیلئے کیے جاتے ہیں، جس کے بدلے روس یوکرینی شہروں پر فضائی اور میزائل حملے جاری رکھے ہوئے ہے۔ روستوف آن دون یوکرین کی سرحد کے قریب واقع ایک اہم لاجسٹک مرکز ہے جہاں روس کی فوجی سپلائی لائنیں اور کمانڈ ڈھانچہ قائم ہے، جس کی وجہ سے یہ شہر گزشتہ برسوں میں بارہا حملوں کا نشانہ بن چکا ہے۔