پلاننگ کمیشن کو معاشی فیصلوں کے لیے بطور مرکزی کلیئرنگ ہاؤس استعمال کیا جائے، نائب وزیراعظم اسحاق ڈار کی حکام کو ہدایت

نائب وزیراعظم اور وزیر خارجہ سینیٹر محمد اسحاق ڈار نے جمعہ کو زور دیا کہ پلاننگ کمیشن ( پی سی) کو اقتصادی فیصلوں کے لیے مرکزی کلیئرنگ ہاؤس کے طور پر کام کرنا چاہیے، تاکہ وزارتوں اور محکموں کو رہنمائی فراہم کی جا سکے، پالیسی کی یکسانیت اور ترقیاتی منصوبہ بندی کو برقرار رکھا جا سکے اور پاکستان کی اقتصادی حکمرانی مضبوط کرنے کے لیے پائیدار اصلاحات کو فروغ دیا جاسکے۔

نائب وزیراعظم کے دفتر نے ہینڈ آؤٹ میں بتایا ہے کہ نائب وزیراعظم محمد اسحاق ڈار نے اقتصادی اصلاحات پر اجلاس کی صدارت کی، جس میں پلاننگ کمیشن ( پی سی ) کے پاکستان کی اقتصادی اور ترقیاتی پالیسی سازی میں تاریخی اور مرکزی کردار کو اجاگر کیا گیا۔

اسحاق ڈار نے پلاننگ کمیشن کو اسٹریٹجک پالیسی سازی میں مرکزی کردار ادا کرنے، ترجیحات دینے اور عوامی سرمایہ کاری کی موثر نگرانی کرنے کے قابل بنانے کی ضرورت پر زور دیا ہے۔

نائب وزیراعظم کے مطابق پلاننگ کمیشن کو وزیراعظم کی سربراہی میں اعلیٰ ترین ادارے کے طور پر کام کرنا چاہیے، جس میں پالیسی اینڈ پلاننگ ونگ اور الگ ترقیاتی ونگ شامل ہوں۔ انہوں نے واضح کیا کہ تمام اہم اقتصادی فیصلے قومی اقتصادی حکمت عملی کے مطابق ہونے چاہئیں، اور شفاف کلیدی کارکردگی کے اشاریے ( کے پی آئیز) مقرر کیے جائیں تاکہ حکومت میں جوابدہی، کارکردگی اور ہم آہنگی یقینی بنائی جا سکے۔

اجلاس میں وزیرِ خزانہ، منصوبہ بندی اور خصوصی اقدامات احسن اقبال؛ وزیرِ موسمیاتی تبدیلی مصدق ملک؛ وزیرِ مملکت برائے خزانہ و محصول سینیٹر محمد اورنگزیب؛ وزیر اعظم کے خصوصی معاون طارق باجوہ؛ وزارتِ منصوبہ بندی کے سیکریٹری؛ اسپیشل انویسٹمنٹ فسیلیٹیشن کونسل ( ایس آئی ایف سی ) کے نیشنل کوآرڈینیٹر اور متعلقہ وزارتوں و محکموں کے سینئر اہلکار شریک ہوئے۔