14 سال بعد ڈھاکہ سے براہ راست پرواز 29 جنوری کو کراچی آئیگی

ڈھاکہ کی قومی ایئرلائن نے جمعرات کو بتایا کہ بنگلہ دیش اور پاکستان ایک دہائی سے زائد عرصے کے بعد براہِ راست پروازیں دوبارہ شروع کرنے جا رہے ہیں، یہ پیشرفت ایسے وقت میں سامنے آئی جب دونوں ممالک کے تعلقات میں گرمجوشی آرہی ہے اور علاقائی طاقت کا توازن بدل رہا ہے۔

بیمان بنگلہ دیش ایئر لائنز کی پہلی ڈھاکہ کراچی پرواز 29 جنوری کو شیڈول ہے جو ہفتے میں دو بار چلائی جائے گی۔ 2012 کے بعد سے یہ دونوں شہروں کے درمیان پہلی باقاعدہ پروازیں ہوں گی۔

ایئرلائن کی منیجر بشریٰ اسلام نے جمعرات کو اے ایف پی سے گفتگو کرتے ہوئے بتایا کہ ہم ہفتے میں دو پروازوں کے ساتھ ڈھاکہ کراچی روٹ دوبارہ شروع کررہے ہیں۔

بنگلہ دیش اور پاکستان جن کے درمیان بھارت کا 1,500 کلومیٹر (930 میل) سے زائد کا جغرافیائی فاصلہ حائل ہے — کبھی ایک ہی ملک تھے۔ یہ دونوں ممالک 1971 کی ایک تلخ جنگ کے بعد الگ ہوئے تھے۔

بیمان بنگلہ دیش ایئر لائنز نے ایک بیان میں کہا کہ براہِ راست پروازوں کی بحالی سے بنگلہ دیش اور پاکستان کے درمیان رابطوں میں نمایاں بہتری آئے گی، جس سے کاروباری سفر، سیاحت اور خاندانوں کے ملاپ میں مدد ملے گی۔

بنگلہ دیش اور پاکستان کے درمیان سفر کرنے والے مسافروں کو فی الحال دبئی اور دوحہ جیسے خلیجی مراکز کے ذریعے کنیکٹنگ فلائٹس استعمال کرنی پڑتی ہیں۔

بنگلہ دیش اگست 2024 میں طلبہ کی قیادت میں ہونے والی اس بغاوت کے بعد سے سیاسی ہیجان کا شکار ہے جس نے شیخ حسینہ کے 15 سالہ آمرانہ دورِ اقتدار کا خاتمہ کر کے انہیں اقتدار سے بے دخل کر دیا تھا۔

شیخ حسینہ کی اقتدار سے بے دخلی کے بعد بنگلہ دیش اور ان کے دیرینہ اتحادی بھارت کے درمیان تعلقات سرد مہری کا شکار ہوگئے ہیں جبکہ دوسری جانب ساتھی مسلم اکثریتی ملک پاکستان کے ساتھ تعلقات میں گرمجوشی آئی ہے۔

نومبر 2024 میں مال بردار بحری جہازوں نے کراچی سے بنگلہ دیش کی اہم ترین بندرگاہ چٹاگانگ کے لیے براہِ راست آمد و رفت دوبارہ شروع کردی تھی۔

اس کے بعد تجارت میں اضافہ ہوا اور ثقافتی تعلقات بھی بڑھے جس کے تحت مشہور پاکستانی گلوکار ڈھاکہ میں پرفارم کر رہے ہیں جبکہ بنگلہ دیشی مریض علاج کے لیے پاکستان کا سفر کر رہے ہیں۔