زہران ممدانی نے ٹرمپ کے سائے تلے میئر نیویارک کا عہدہ سنبھال لیا

امریکی بائیں بازو کے ابھرتے ہوئے رہنما 34 سالہ زہران ممدانی نے یکم جنوری 2026 کی آدھی رات کو ایک ترک شدہ سب وے اسٹیشن پر نیویارک کے میئر کے طور پر حلف اٹھا لیا۔ وہ اس عہدے پر فائز ہونے والے پہلے مسلمان ہیں۔

انہوں نے حلف برداری کے لیے قرآن مجید کے نسخوں کا استعمال کیا۔ زہران ممدانی نے اپنی مہم سستی رہائش، مفت بس سروس اور بچوں کی دیکھ بھال جیسے عوامی ایجنڈے پر لڑی۔

زہران ممدانی کی میئرشپ کا آغاز صدر ڈونلڈ ٹرمپ کے سائے تلے ہو رہا ہے، جس کے باعث دونوں کے درمیان سیاسی محاذ آرائی متوقع ہے۔ اگرچہ نومبر میں وائٹ ہاؤس میں ان کی ملاقات خوشگوار رہی لیکن ٹرمپ ماضی میں انہیں ”کمیونسٹ پاگل“ کہہ چکے ہیں، جبکہ ممدانی انہیں ”فاشسٹ“ قرار دے چکے ہیں۔

ان کی حلف برداری اٹارنی جنرل لیٹیشیا جیمز نے کروائی، جنہوں نے ٹرمپ کے خلاف فراڈ کیس کی پیروی کی تھی۔ تقریب میں برنی سینڈرز اور الیگزینڈریا اوکاسیو کورٹیز جیسے ترقی پسند رہنماؤں نے بھی شرکت کی۔ اگرچہ ممدانی نے تجربہ کار مشیروں کی خدمات حاصل کی ہیں، لیکن ناقدین کا کہنا ہے کہ اب علامتی سیاست کے بجائے ان کے لیے نتائج فراہم کرنا اصل چیلنج ہوگا۔ فلسطینی حقوق کے علمبردار ہونے کے ناطے انہیں یہودی کمیونٹی کو بھی اپنے جامع طرزِ حکمرانی کا یقین دلانا ہوگا۔