نیپرا نے صنعتی اور زرعی صارفین کیلئے فی یونٹ 22.98 روپے کی یکساں بجلی نرخوں کی منظوری دیدی

نیشنل الیکٹرک پاور ریگولیٹری اتھارٹی (نیپرا) نے حکومتی اعلان کے مطابق صنعتوں اور کسانوں کے لیے بجلی سستی کرنے کی منظوری دے دی ہے ، تاکہ کاروباری اخراجات کم ہوں اور ملک کی معیشت بہتر ہو۔

وزیر اعظم شہباز شریف نے اکتوبر 2025 میں اعلان کیا تھا کہ آئندہ تین برس میں صنعتوں اور زرعی شعبے کو اضافی بجلی سبسڈی پر فراہم کی جائے گی۔

نئے ٹیرف ڈھانچے کے تحت زرعی شعبے کے لیے اضافی یونٹس کی قیمت 38 روپے فی یونٹ سے کم کر کے 22.98 روپے فی یونٹ کر دی گئی ہے، جبکہ صنعتی شعبے کے لیے یہ نرخ 34 روپے سے کم کر کے 22.98 روپے فی یونٹ کر دیے گئے ہیں۔

پاور ڈویژن کا کہنا ہے کہ یہ بڑا ریلیف اقدام دونوں شعبوں کے صارفین کے لیے خریدی جانے والی بجلی کی اوسط قیمت کو کم کرے گا۔

مزید بتایا گیا کہ مذکورہ نئے نرخوں کے تحت اضافی 100 یونٹس استعمال کرنے والے زرعی صارفین اپنی اوسط بجلی کی قیمت میں تقریباً 7 روپے فی یونٹ کی کمی دیکھیں گے۔ اسی طرح اضافی 1,000 یونٹس استعمال کرنے والے صنعتی صارفین کی قیمت میں تقریباً 5 روپے فی یونٹ کمی آئے گی۔

وزیر توانائی سردار اویس احمد خان لغاری کا کہنا تھا کہ تین سالہ صنعتی پیکیج سے شعبہ اپنی مستقبل کی منصوبہ بندی اعتماد اور استحکام کے ساتھ کر سکے گا۔ انہوں نے مزید کہا کہ گرین فیلڈ صنعتیں بشمول ڈیٹا سینٹرز اور کرپٹو مائننگ آپریشنز بھی اس نئے ٹیرف ڈھانچے سے فائدہ اٹھائیں گی۔

پاور ڈویژن نے واضح کیا کہ صنعتی سپورٹ پیکیج رہائشی یا کمرشل صارفین پر کسی بھی طرح اثر انداز نہیں ہوگا۔

ڈویژن کا کہنا ہے کہ یہ پیکیج صنعتی اور زرعی سرگرمیوں کو فروغ دینے کے لیے تیار کیا گیا ہے اور توقع ہے کہ یہ پیداوار کو بڑھائے گا، مسابقت کو مضبوط اور ملک بھر میں روزگار کے نئے مواقع پیدا کرے گا۔

مزید کہا گیا کہ اس کمی سے پیداوار میں اضافہ اور اقتصادی سرگرمیوں میں حوصلہ افزائی متوقع ہے۔

پاور ڈویژن نے مزید کہا کہ یہ اقدامات حکومت کے عوام سے کیے گئے وعدوں کی تکمیل اور بجلی کے نرخوں کو زیادہ قابل برداشت اور ترقیاتی بنانے کے عزم کی عکاسی کرتے ہیں۔ وفاقی حکومت کو یقین ہے کہ یہ اقدام اقتصادی احیاء میں مددگار ثابت ہوگا اور ملک کے اہم پیداواری شعبوں کو ریلیف فراہم کرے گا۔