گندھارا کا ژونگ ٹونگ کی شراکت سے لگژری بسیں متعارف کرانے کا اعلان

آٹو سیکٹر کے لیے ایک اہم پیش رفت میں پاکستانی آٹو اسمبلر گندھارا انڈسٹریز لمیٹڈ نے عالمی بس ساز کمپنی ژونگ ٹونگ بس ہولڈنگ کمپنی لمیٹڈ کے ساتھ اسٹریٹجک شراکت داری کا معاہدہ کیا ہے، جس کے تحت پاکستان میں ژونگ ٹونگ کی لگژری بسیں متعارف کرائی جائیں گی۔

لسٹڈ کمپنی، جو اسوزو گاڑیوں کی پروگریسو مینوفیکچرنگ میں بھی شامل ہے، نے اس پیش رفت سے متعلق جمعہ کو پاکستان اسٹاک ایکسچینج کو اپنے نوٹس کے ذریعے آگاہ کیا۔

نوٹس میں کہا گیا کہ کمپنی نے پاکستانی مارکیٹ میں لگژری بسوں کے تعارف اور تقسیم کے لیے ژونگ ٹونگ کے ساتھ باضابطہ کولیبوریشن ایگریمنٹ پر دستخط کر دیے ہیں۔ مزید کہا گیا کہ یہ اقدام کمپنی کے پراڈکٹ پورٹ فولیو میں توسیع کی جانب ایک اہم سنگ میل کی حیثیت رکھتا ہے۔

معاہدے کے تحت گندھارا ایک نئی بس مینوفیکچرنگ لائن قائم کرے گی جہاں ژونگ ٹونگ کی بسیں اسمبل کی جائیں گی۔ یہ نئی اسمبلی لائن کمپنی کی موجودہ بس باڈی فیبریکیشن سہولت کے علاوہ ہوگی، جس سے کمپنی پاکستان میں ان بسوں کی مقامی اسمبلنگ اور مینوفیکچرنگ کے قابل ہو جائے گی۔

کمپنی کو توقع ہے کہ کمپلیٹلی بلٹ اپ یعنی سی بی یو لگژری بسیں 2026 کی پہلی سہ ماہی سے پاکستان میں لانچ کی جائیں گی، جبکہ گندھارا کی سہولت پر ژونگ ٹونگ بسوں کی مقامی اسمبلی کا آغاز وسط 2026 تک متوقع ہے۔

یہ پیش رفت ریگولیٹری منظوریوں اور پلانٹ کی توسیع کی تکمیل سے مشروط ہے۔

1958 میں قائم ہونے والی ژونگ ٹونگ ایک چینی کمرشل وہیکل ساز کمپنی ہے جو بنیادی طور پر بسوں کے لیے جانی جاتی ہے، جن میں نیو انرجی اور انرجی سیونگ ماڈلز بھی شامل ہیں۔ کمپنی عالمی بس مارکیٹ میں ایک بڑا کھلاڑی ہے اور متعدد ممالک کو اپنی مصنوعات برآمد کرتی ہے۔

پاکستان کے تیزی سے پھیلتے ہوئے آٹو سیکٹر پر جاپانی آٹو جائنٹس سوزوکی، ہونڈا اور ٹویوٹا کی بڑی حد تک اجارہ داری ہے، تاہم حالیہ برسوں میں ہنڈائی، کیا اور سازگار انجینئرنگ ورکس لمیٹڈ جیسی نئی کمپنیوں کی شمولیت سے مقابلے میں اضافہ ہوا ہے۔

اس سے قبل رواں ماہ نشاط گروپ کی پاکستانی ذیلی کمپنی نیکس جن آٹو کی جانب سے قائم کردہ الیکٹرک وہیکل پروڈکشن پلانٹ نے اپنی منصوبہ بند لانچ سے کئی ماہ قبل ہی پیداوار شروع کر دی تھی۔