اضافی رسد کے خدشات، خام تیل کی قیمتیں گرگئیں

عالمی منڈی میں تیل کی قیمتوں میں معمولی کمی دیکھی گئی ہے کیونکہ سرمایہ کاروں نے اوپیک پلس کی جانب سے پیداوار میں اضافے کے منصوبے کو آئندہ سال کی پہلی سہ ماہی تک مؤخر کرنے کے فیصلے اور ممکنہ اضافی رسد کے خدشات کو مدنظر رکھا۔

منگل کے روز برینٹ کروڈ فیوچرز 9 سینٹ یا 0.1 فیصد کمی کے ساتھ 64.80 ڈالر فی بیرل پر آ گئے، جبکہ امریکی ویسٹ ٹیکساس انٹرمیڈیٹ کروڈ 10 سینٹ یا 0.2 فیصد کمی سے 60.95 ڈالر فی بیرل پر ٹریڈ ہوا۔

اتوار کو تیل برآمد کرنے والے ممالک کی تنظیم (اوپیک) اور اس کے اتحادیوں، جنہیں مجموعی طور پر اوپیک پلس کہا جاتا ہے، نے دسمبر کے لیے معمولی پیداوار میں اضافہ اور آئندہ سال کی پہلی سہ ماہی کے لیے اضافے کو مؤخر کرنے پر اتفاق کیا۔ اپریل سے اب تک اوپیک پلس نے اپنی پیداوار کے اہداف میں تقریباً 2.9 ملین بیرل یومیہ اضافہ کیا ہے، جو عالمی سپلائی کا تقریباً 2.7 فیصد بنتا ہے، تاہم اکتوبر سے رفتار کو سست کیا گیا تاکہ ممکنہ اضافی رسد سے بچا جا سکے۔

بینک آف امریکا نے اپنی رپورٹ میں کہا کہ یہ فیصلہ ظاہر کرتا ہے کہ اوپیک پلس کو اضافی رسد کا ادراک ہے اور وہ نہیں چاہتا کہ قیمتیں 50 ڈالر فی بیرل سے نیچے گریں۔

ادھر یورپ کی بڑی توانائی کمپنیوں کے سربراہان نے ان خدشات کو مسترد کیا ہے کہ اگلے سال تیل کی اضافی سپلائی ہوگی، ان کے مطابق بڑھتی ہوئی عالمی طلب اور پیداوار میں نرمی قیمتوں کو سہارا دے گی۔ امریکی محکمہ توانائی کے نائب سیکریٹری جیمز ڈینلی نے بھی کہا کہ 2026 میں تیل کی زائد رسد کا امکان نہیں۔

ذرائع کے مطابق روس نے مغربی پابندیوں کے باعث برآمدات بڑھانے میں مشکلات کے پیشِ نظر پیداوار میں اضافے کو مؤخر کرنے کے لیے اوپیک پلس پر دباؤ ڈالا۔

دوسری جانب مارکیٹ اب امریکی تیل کے ذخائر سے متعلق امریکی پیٹرولیم انسٹیٹیوٹ (اے پی آئی) کے تازہ اعداد و شمار کا انتظار کر رہی ہے، جن سے آئندہ تجارتی رجحان کے بارے میں مزید اشارے ملنے کی توقع ہے۔