پاکستان کا روزویلٹ ہوٹل گرا کر فلک بوس عمارت تعمیر کرنے پر غور

امریکی مالیاتی خبر رساں ادارے بلومبرگ کے مطابق پاکستان انٹرنیشنل ایئرلائنز (پی آئی اے) کی ملکیت روزویلٹ ہوٹل نیویارک سے متعلق مختلف آپشنز پر غور کر رہا ہے، جن میں اس تاریخی عمارت کو منہدم کر کے اس کی جگہ ایک فلک بوس عمارت تعمیر کرنا بھی شامل ہے۔ یہ اقدام بین الاقوامی مالیاتی فنڈ (آئی ایم ایف) سے کیے گئے وعدوں کی تکمیل کے لیے پاکستان کی کوششوں کا حصہ ہے۔

یہ 1,025 کمروں پر مشتمل ہوٹل مین ہٹن میں واقع ہے، جسے 2020 میں کورونا وبا کے دوران آمدنی میں شدید کمی کے باعث بند کر دیا گیا تھا۔ تین سال بعد اسے عارضی طور پر مہاجرین کی رہائش کے لیے استعمال کیا گیا، تاہم اس کے بعد سے یہ بند ہے۔

وزیراعظم کے مشیر برائے نجکاری محمد علی نے بلومبرگ سے اسلام آباد میں گفتگو کرتے ہوئے کہا کہ حکومت ایک جوائنٹ وینچر کے ذریعے منصوبہ آگے بڑھانے کی خواہش رکھتی ہے، جس میں پاکستان زمین فراہم کرے گا جبکہ نجی شراکت دار سرمایہ لگائے گا۔

انہوں نے کہا کہ دوسرا آپشن یہ ہے کہ اگر مالی طور پر فائدہ مند ہو تو ہوٹل کو برقرار رکھا جائے۔ محمد علی کے مطابق ہمیں اگلے چند مہینوں میں واضح صورتحال حاصل ہو جائے گی جب جوائنٹ وینچر پارٹنر کا انتخاب اور مارکیٹ مشاورت مکمل ہو جائے گی۔

بلومبرگ کے مطابق، وزیراعظم شہباز شریف کی حکومت کئی برسوں بعد سرکاری اداروں کی تنظیمِ نو اور نجکاری کے لیے سب سے بڑا منصوبہ آگے بڑھا رہی ہے، جو آئی ایم ایف کے ساتھ 7 ارب ڈالر کے قرض معاہدے کا حصہ ہے۔

محمد علی کے مطابق، نجکاری کے لیے سب سے پہلا اثاثہ پی آئی اے ہو سکتا ہے، اور حکومت کو امید ہے کہ یہ عمل نومبر تک مکمل ہو جائے گا۔ انہوں نے بتایا کہ پی آئی اے خریدنے میں دلچسپی رکھنے والے گروپس ملک کے چند بڑے کاروباری گروپ ہیں، جن کے پاس ادارے کو چلانے کی صلاحیت موجود ہے۔ ان کے مطابق، ایئرلائن کو دوبارہ منافع بخش بنانے کے لیے تقریباً آدھے ارب ڈالر کی سرمایہ کاری درکار ہو گی۔

بلومبرگ کے مطابق، پاکستان روزویلٹ ہوٹل کے لیے مشیر کی تقرری کے عمل میں ہے، جسے بعض حلقے اس کے تاریخی کردار کے باعث نیا ایلس آئی لینڈ بھی قرار دیتے ہیں۔ رپورٹ میں کہا گیا کہ حکومت اس ماہ کے آخر تک سات بین الاقوامی اداروں — جن میں سٹی گروپ , سی بی آر ای گروپ., اور سیولز پی ایل سی شامل ہیں — کی بولیوں کے بعد مشیر کا انتخاب مکمل کرے گی۔

یہ ہوٹل 1924 میں قائم کیا گیا تھا اور امریکی صدر تھیوڈور روزویلٹ کے نام پر رکھا گیا تھا۔ یہ گرینڈ سینٹرل ٹرمینل، جو نیویارک کا مرکزی ریلوے اسٹیشن ہے، کے بالکل قریب واقع ہے۔