ٹیرف کے باعث طلب کے خدشات، تیل کی قیمتیں جون کے بعد سب سے بڑی کمی کی جانب مائل

ابتدائی ایشیائی تجارت میں جمعہ کو خام تیل کی قیمتوں میں معمولی ردوبدل دیکھا گیا، تاہم یہ جون کے آخر کے بعد سے سب سے بڑی ہفتہ وار کمی کی جانب بڑھ رہی ہیں کیونکہ سرمایہ کار جمعرات سے نافذ ہونے والے امریکی ٹیرف کے عالمی معیشت پر اثرات کے بارے میں فکر مند ہیں۔

برینٹ کروڈ فیوچرز تین سینٹ کمی کے ساتھ 66.40 ڈالر فی بیرل پر آ گئے، جو ہفتہ وار بنیاد پر 4 فیصد سے زیادہ کمی کی راہ پر ہیں۔ امریکی ویسٹ ٹیکساس انٹرمیڈیٹ (ڈبلیو ٹی آئی) فیوچرز چھ سینٹ یا 0.1 فیصد گر کر 63.82 ڈالر فی بیرل پر آ گئے اور ہفتہ وار بنیاد پر 5 فیصد سے زیادہ کمی کا امکان ہے۔

تجزیہ کاروں کے مطابق، متعدد تجارتی شراکت داروں پر عائد نئے امریکی ٹیرف کمزور معاشی سرگرمی کے خدشات بڑھا رہے ہیں، جو خام تیل کی طلب کو متاثر کریں گے۔ قیمتیں پہلے ہی اوپیک پلس کے گزشتہ ہفتے پیداوار میں سب سے بڑی کٹوتی ستمبر میں ختم کرنے کے فیصلے سے دباؤ میں تھیں۔

جمعرات کو کاروبار کے اختتام تک ڈبلیو ٹی آئی مسلسل چھ سیشنز سے گراوٹ کا شکار رہا، جو دسمبر 2023 کے بعد سب سے طویل سلسلہ ہے، اور اگر جمعہ کو بھی کمی رہی تو یہ اگست 2021 کے بعد سب سے لمبا سلسلہ ہوگا۔

مزید دباؤ اس وقت آیا جب کریملن نے تصدیق کی کہ روسی صدر ولادیمیر پوٹن آئندہ دنوں میں امریکی صدر ڈونلڈ ٹرمپ سے ملاقات کریں گے، جس سے یوکرین جنگ کے سفارتی حل کی امیدیں بڑھ گئیں۔

بھارت کی روسی تیل کی خریداری پر اضافی امریکی ٹیرف نے قیمتوں میں کمی کو کسی حد تک محدود کیا، تاہم ماہرین کے مطابق اس سے روسی تیل کی عالمی منڈیوں میں فراہمی میں نمایاں کمی کا امکان نہیں۔ ٹرمپ نے بدھ کو کہا تھا کہ چین کو بھی ایسے ہی ٹیرف کا سامنا ہو سکتا ہے جیسے بھارتی درآمدات پر عائد ہیں۔