غزہ پر اسرائیلی حملے، کم از کم 27 فلسطینی شہید: سول ڈیفنس

غزہ کی سول ڈیفنس ایجنسی کے مطابق، اتوار کے روز اسرائیلی فضائی حملوں میں کم از کم 27 فلسطینی شہید ہو گئے، جن میں چھ افراد ایک پانی کی تقسیم کے مرکز کے قریب مارے گئے۔

سول ڈیفنس کے ترجمان محمود باسل نے اے ایف پی کو بتایا کہ غزہ شہر کو رات بھر اور صبح سویرے متعدد فضائی حملوں کا نشانہ بنایا گیا، جن میں آٹھ افراد شہید ہوئے، جن میں خواتین اور بچے شامل ہیں، جبکہ کئی دیگر زخمی بھی ہوئے۔

محمود باسل کے مطابق، ایک اسرائیلی فضائی حملہ نصیرات پناہ گزین کیمپ کے قریب ایک رہائشی مکان پر کیا گیا، جس کے نتیجے میں ”10 افراد شہید اور متعدد زخمی“ ہوئے۔

انہوں نے مزید بتایا کہ ایک اور حملہ ”پینے کے پانی کی تقسیم کے ایک مرکز پر کیا گیا… جو نصیرت کیمپ کے مغرب میں بے گھر افراد کے لیے قائم علاقے میں واقع تھا“۔ اس حملے میں ”چھ افراد شہید اور کئی دیگر زخمی“ ہوئے۔

جنوبی غزہ میں، الماواسی کے ساحلی علاقے میں ایک خیمے پر فضائی حملے میں تین افراد شہید ہوئے، جو بے گھر فلسطینیوں کو پناہ دینے کے لیے قائم کیا گیا تھا۔

اسرائیلی فوج کی جانب سے ان حملوں پر فوری طور پر کوئی تبصرہ نہیں کیا گیا۔ تاہم، اسرائیل نے حالیہ دنوں میں اکتوبر 2023 میں حماس کے حملے کے بعد شروع ہونے والی جنگ کے 21ویں مہینے میں غزہ بھر میں اپنی کارروائیاں تیز کر دی ہیں۔

غزہ میں دو ملین سے زائد کی آبادی میں اکثریت کم از کم ایک بار نقل مکانی پر مجبور ہو چکی ہے، اور علاقے میں انسانی بحران شدت اختیار کر چکا ہے۔

غزہ میں میڈیا پر پابندیاں اور متعدد علاقوں تک رسائی میں مشکلات کی وجہ سے اے ایف پی آزادانہ طور پر سول ڈیفنس یا دیگر ذرائع کی فراہم کردہ تفصیلات اور اعداد و شمار کی تصدیق نہیں کر سکتا۔