وفاقی وزیر برائے ریلوے حنیف عباسی نے کہا ہے کہ حکومت پنجاب نے صوبے میں ریلوے ٹریکس کی اپگریڈیشن اور ڈوئلائزیشن کے لیے 350 ارب روپے کی سرمایہ کاری پر آمادگی ظاہر کی ہے۔
وفاقی وزیر حنیف عباسی نے جمعہ کو رائے حسن نواز خان کی زیر صدارت ہونے والے قومی اسمبلی کی قائمہ کمیٹی برائے پاکستان ریلوے کے اجلاس کو بریفنگ دیتے ہوئے بتایا کہ وزیر اعلیٰ پنجاب مریم نواز شریف نے صوبے میں ریلوے ٹریکس کی اپگریڈیشن اور ڈوئلائزیشن میں دلچسپی کا اظہار کیا ہے۔
کمیٹی نے ریلوے کنسٹرکشن کمپنی ، پاکستان ریلوے ایڈوائزری اینڈ کنسلٹنسی سروسز اور پاکستان ریلوے فریٹ اینڈ ٹرانسپورٹیشن کمپنی کے خاتمے کی وجوہات کے بارے میں بھی استفسار کیا۔
سوالات کے جواب میں حنیف عباسی نے کمیٹی کو بتایا کہ پاکستان ریلوے نے وفاقی حکومت کی پالیسی کے تحت رائٹ سائزنگ اپنائی ہے اور ان سرکاری اداروں (ایس او ایز) کی خدمات کی مزید ضرورت نہیں رہی کیونکہ یہ خدمات پاکستان ریلوے خود انجام دے رہا ہے۔
لہٰذا وزارت نے ان اداروں کو ختم کرنے کا فیصلہ کیا۔ کمیٹی نے سفارش کی کہ ان اداروں کے تجربہ کار ملازمین کو پاکستان ریلوے میں بروئے کار لایا جائے۔
کمیٹی کے اراکین نے انکشاف پر شدید تشویش کا اظہار کیا کہ پاکستان ریلوے کے تقریباً 47 افسران بیرونِ ملک مقیم ہیں لیکن تنخواہیں اور تمام مراعات پاکستان ریلوے سے وصول کررہے ہیں۔ وزیر ریلوے نے کمیٹی کو آگاہ کیا کہ ان تمام افسران کے کیسز کا جائزہ لیا جارہا ہے۔
کمیٹی نے اس معاملے پر تفصیلی رپورٹ آئندہ اجلاس میں پیش کرنے کی سفارش کی، اس کے ساتھ کمیٹی نے یہ بھی سفارش کی کہ پاکستان ریلوے نوشہرہ ضلع کے علاقے نوشہرہ کلاں میں دریائے کابل پر واقع ریلوے پل (ریڈ برج)، خصوصاً پیدل چلنے والوں کے راستے، کی مرمت/بحالی کا کام کرے۔
کمیٹی نے ایک ذیلی کمیٹی تشکیل دی ہے تاکہ پاکستان ریلوے کراچی کے موجودہ تعینات شدہ ڈویژنل سپرنٹنڈنٹ اور پاکستان ریلوے کے چیف ایگزیکٹو آفیسر (سی ای او) سے متعلق آڈیو لیک کی انکوائری رپورٹس کا جائزہ لیا جا سکے۔ اس ذیلی کمیٹی کی صدارت رکنِ قومی اسمبلی شفق عباس کریں گے، جبکہ دیگر اراکین میں ابرار احمد، صادق علی میمن اور سید وسیم حسین شامل ہوں گے۔ ذیلی کمیٹی اپنی رپورٹ 30 دن کے اندر مرکزی کمیٹی کو پیش کرے گی۔
کمشنر ڈیرہ غازی خان ڈویژن نے کمیٹی کو تحصیل و ضلع مظفرگڑھ کے موضع سوناکی کی زمین سے متعلق رپورٹ پیش کی تاہم کمیٹی نے اس رپورٹ سے اتفاق نہیں کیا۔
کاپی رائٹ بزنس ریکارڈر 2025
Comments
Comments are closed.