ایلون مسک نے چینی صدر شی جن پنگ کو عظیم رہنما قرار دیدیا

ٹیسلا کے چیف ایگزیکٹو آفیسر ایلون مسک نے بدھ کو چینی سرکاری ٹیلی ویژن نیٹ ورک سی سی ٹی وی کو دیے گئے ایک انٹرویو کے دوران چینی صدر شی جن پنگ کو ایک عظیم رہنما قرار دیتے ہوئے ان کی تعریف کی۔

ایلون مسک نے کہا کہ ان کی قیادت میں چین نے بے پناہ ترقی کی ہے، اور اس حوالے سے ملک میں تعمیر ہونے والی نئی عمارتوں اور بنیادی ڈھانچے میں ہونے والی پیش رفت کا حوالہ دیا۔

انہوں نے مزید کہا کہ سڑکوں پر گھومتے ہوئے بھی یہ واضح طور پر دیکھا جاسکتا ہے کہ اوسط چینی شہری کی خوشحالی میں اضافہ ہوا ہے۔

ایلون مسک نے ٹیسلا کے سب سے بڑے پیداواری مرکز پر بھی تبصرہ کیا، جو شنگھائی میں واقع ہے، اور وہاں کی ٹیم کو انتہائی باصلاحیت، محنتی اور قابلِ اعتماد قرار دیا۔

انہوں نے کہا کہ ٹیسلا کی شنگھائی فیکٹری ایک نایاب اثاثہ ہے اور حقیقت میں بہت خوبصورت ہے، اگر کسی نے اسے کبھی دیکھا ہو۔

چینی صدر شی جن پنگ جمعرات کو امریکی صدر ڈونلڈ ٹرمپ سے ملاقات کرنے والے ہیں۔ یہ دنیا کی دو سب سے بڑی معیشتوں کے رہنماؤں کے درمیان رواں سال دوسری سربراہی ملاقات ہوگی۔