ڈالر کی قدر میں کمی کے خدشات برقرار، سونے کی قیمت میں اضافہ

عالمی مارکیٹ میں جمعرات کو سونے کی قیمت میں اضافہ ہوا، کیونکہ ڈالر کی قدر میں ممکنہ کمی اور امریکی بجٹ خسارے سے متعلق خدشات برقرار رہے، جبکہ سرمایہ کاروں کی نظریں امریکی فیڈرل ریزرو کے چیئرمین کیون وارش کے متوقع بیان پر مرکوز ہوگئیں۔

اسپاٹ گولڈ کی قیمت 0.8 فیصد اضافے کے بعد 4,630.09 ڈالر فی اونس ہوگئی، جبکہ امریکی گولڈ فیوچرز 0.7 فیصد بڑھ کر 4,685.50 ڈالر فی اونس پر پہنچ گئے۔

او اے این ڈی اے کے سینئر مارکیٹ تجزیہ کار کیلون وونگ کے مطابق ڈالر کی قدر میں کمی کا خدشہ اور امریکی بجٹ خسارے سے متعلق تشویش درمیانی مدت میں سونے کی قیمتوں کے لیے معاون عوامل ہیں۔ گزشتہ ہفتے امریکی محکمہ خزانہ کی جانب سے پرانے طویل مدتی بانڈز کی خریداری میں توسیع کے اعلان کے بعد سونے کی قیمت میں 5 فیصد سے زیادہ اضافہ ہوا تھا، جس سے ڈالر کی قدر میں کمی کے خدشات بڑھے۔

وونگ نے کہا کہ مارکیٹ فیڈ چیئرمین کیون وارش کی وائیومنگ میں سالانہ جیکسن ہول سمپوزیم سے خطاب کی منتظر ہے۔ سرمایہ کار یہ جاننا چاہتے ہیں کہ فیڈ موجودہ معاشی صورتحال میں مانیٹری پالیسی کو کس طرح آگے بڑھائے گا۔

سی ایم ای فیڈ واچ ٹول کے مطابق مارکیٹ میں ستمبر میں امریکی شرح سود میں اضافے کا امکان 36.5 فیصد جبکہ دسمبر تک یہ امکان 72.7 فیصد لگایا جا رہا ہے۔

دریں اثنا بدھ کو جاری اعداد و شمار کے مطابق امریکا میں جولائی کی سالانہ مہنگائی غیر متوقع طور پر مستحکم رہی اور مسلسل 65ویں ماہ فیڈ کے 2 فیصد ہدف سے بلند رہی۔

سونے کو جغرافیائی سیاسی اور معاشی خطرات کے خلاف محفوظ سرمایہ کاری تصور کیا جاتا ہے، تاہم بلند شرح سود اس کی کشش کم کرسکتی ہے۔

دیگر قیمتی دھاتوں میں اسپاٹ سلور 1.7 فیصد اضافے سے 69.28 ڈالر، پلاٹینم 1.1 فیصد بڑھ کر 1,848.57 ڈالر جبکہ پیلاڈیم 0.5 فیصد اضافے سے 1,334.49 ڈالر فی اونس ہوگیا۔