وحدت پولٹری نے پیسچرائزیشن پلانٹ کے لیے اراضی خریدلی

وحدت پولٹری فارم لمیٹڈ نے بدھ کو اعلان کیا کہ اس نے ضلع سرگودھا کے بھلوال انڈسٹریل اسٹیٹ میں 1.02 ایکڑ اراضی حاصل کرلی ہے جس کی مالیت 2 کروڑ 81 لاکھ 30 ہزار روپے ہے۔ یہ اراضی کمپنی کے مجوزہ پیسچرائزیشن پلانٹ کے قیام کے لیے حاصل کی گئی ہے۔

کمپنی نے یہ اطلاع آج پاکستان اسٹاک ایکسچینج کو جاری کردہ نوٹس میں دی۔

نوٹس میں مزید بتایا گیا کہ مذکورہ اراضی کی خریداری کیلئے رقم کمپنی کے ابتدائی عوامی پیشکش (آئی پی او) سے حاصل ہونے والی آمدنی سے فراہم کی گئی جو پراسپیکٹس میں ظاہر کیے گئے فنڈز کے استعمال کے منصوبے کے مطابق ہے۔

کمپنی نے کہا کہ اراضی کا حصول کمپنی کی ویلیو ایڈڈ توسیعی حکمتِ عملی پر عمل درآمد میں ایک اہم سنگِ میل ہے۔

مذکورہ اراضی پر قائم کیے جانے والے پیسچرائزیشن پلانٹ سے کمپنی کی پروسیسنگ صلاحیت میں اضافہ، ویلیو ایڈڈ انڈوں کی مصنوعات کے شعبے میں کاروباری تنوع پیدا کرنے اور مجموعی آپریشنل کارکردگی و مارکیٹ میں مسابقتی صلاحیت کو مضبوط بنانے کی توقع ہے۔

مزید برآں نوٹس میں کہا گیا کہ کمپنی اپنے توسیعی منصوبوں پر بروقت عمل درآمد کے لیے پرعزم ہے اور آئندہ اہم پیش رفت، بشمول تعمیراتی کام میں پیش رفت اور پلانٹ و مشینری کی تنصیب سے پاکستان اسٹاک ایکسچینج اور اپنے شیئر ہولڈرز کو آگاہ کرتی رہے گی۔