اسلام آباد ائیرپورٹ کی آؤٹ سورسنگ کیلئے ایشیائی ترقیاتی بینک مالیاتی مشیر مقرر

نجکاری کمیشن (پی سی) نے اسلام آباد انٹرنیشنل ائیرپورٹ (آئی ایل اے پی) کے آپریشنز کی آؤٹ سورسنگ کے لیے ایشیائی ترقیاتی بینک (اے ڈی بی) کو مالیاتی مشیر (فائنینشل ایڈوائزر) مقرر کر دیا ہے۔

نجکاری کمیشن کی جانب سے جاری بیان کے مطابق یہ فیصلہ جمعہ کو نجکاری کے لیے وزیرِ اعظم کے مشیر اور چیئرمین نجکاری کمیشن محمد علی کی زیرِ صدارت منعقدہ پی سی بورڈ کے 255 ویں اجلاس میں کیا گیا۔ بورڈ نے اسلام آباد ائیرپورٹ کے لیے ایشیائی ترقیاتی بینک کے ساتھ ٹرانزیکشن ایڈوائزری سروسز ایگریمنٹ (ٹی اے ایس اے) پر دستخط کرنے کی منظوری دی۔

بیان میں کہا گیا کہ پی سی بورڈ نے مذاکرات کے بعد طے پانے والے ٹرانزیکشن ایڈوائزری سروسز ایگریمنٹ کی شرائط کا جائزہ لیا اور اے ڈی بی کے ساتھ معاہدے کی توثیق کی۔ پی سی بورڈ نے اس اعتماد کا اظہار کیا کہ اے ڈی بی اپنی مہارت اور تجربے کی بدولت زیادہ سے زیادہ مقابلے اور شفافیت کو یقینی بناتے ہوئے اس اہم ٹرانزیکشن کو تیزی سے اور کامیابی کے ساتھ مکمل کرنے کی صلاحیت رکھتا ہے۔

مزید برآں بیان میں کہا گیا کہ اسلام آباد انٹرنیشنل ائیرپورٹ کو مسابقتی بولی کے عمل (کمپیٹیٹو بڈنگ) کے ذریعے طویل مدتی رعایتی فریم ورک کے تحت نجی شعبے کے ایک اہل آپریٹر کے حوالے (آؤٹ سورس) کیا جائے گا۔ اس نجکاری سے آپریشنل کارکردگی میں اضافہ، مسافروں کے تجربے میں بہتری اور ائیرپورٹ کی خدمات کو بین الاقوامی بہترین طریقوں کے مطابق ڈھالنے میں مدد ملنے کی توقع ہے۔

علاوہ ازیں بورڈ کی آڈٹ کمیٹی کی سفارش پر پی سی بورڈ نے مالیاتی سال 26-2025 سے 28-2027 تک کے تین سالہ مالیاتی گوشواروں کے آڈٹ کے لیے چارٹرڈ اکاؤنٹنٹس فرم ”بی ڈی او ابراہیم اینڈ کمپنی“ کو بیرونی آڈٹ کنندہ (ایکسٹرنل آڈیٹر) مقرر کرنے کی بھی منظوری دے دی۔