روسی میزائل اور ڈرون حملہ، کیف میں 7 افراد ہلاک، متعدد عمارتیں تباہ

روس نے پیر کی صبح یوکرین کے دارالحکومت کیف پر میزائلوں اور ڈرونز سے شدید حملہ کیا، جس کے نتیجے میں کم از کم 7 افراد ہلاک اور 24 زخمی ہو گئے، جبکہ متعدد رہائشی عمارتوں کو بھی شدید نقصان پہنچا۔

کیف کی فوجی انتظامیہ کے سربراہ تیمور تکاچینکو نے ٹیلی گرام پر بتایا کہ ہلاک ہونے والوں میں تاریخی پوڈیلسکی ضلع کی ایک بری طرح متاثرہ رہائشی عمارت سے نکالی گئی دو لاشیں بھی شامل ہیں۔ ان کے مطابق صرف پوڈیلسکی ضلع میں چار رہائشی عمارتیں حملے کی زد میں آئیں۔

کیف کے میئر ویٹالی کلچکو نے بتایا کہ امدادی ٹیمیں تباہ شدہ عمارتوں کے ملبے تلے دبے اور پھنسے ہوئے افراد کو نکالنے میں مصروف ہیں۔ انہوں نے کہا کہ پوڈیلسکی ضلع میں جزوی طور پر منہدم ہونے والی عمارت سے 15 افراد کو بحفاظت نکالا گیا، جن میں 3 خواتین اور 6 بچے بھی شامل تھے۔

میئر کے مطابق مشرقی دارنیتسکی ضلع میں بھی ڈرون کے ملبے کے ایک 25 منزلہ رہائشی ٹاور سے ٹکرانے کے نتیجے میں 2 افراد ہلاک ہوئے، جبکہ بالائی منزلوں پر پھنسے مکینوں کو نکالنے کے لیے امدادی کارروائیاں جاری ہیں۔ اسی ضلع کی ایک 30 منزلہ عمارت میں بھی آگ بھڑک اٹھی۔

رائٹرز کے مطابق حملے کے دوران کیف اور اس کے گردونواح میں متعدد دھماکوں کی آوازیں سنی گئیں، جبکہ یوکرینی فضائی دفاعی نظام نے روسی ڈرونز کو نشانہ بنانے کی کوشش کی۔ حملے کے بعد شہر میں دھواں پھیل گیا، فضائی آلودگی بڑھنے پر شہریوں کو کھڑکیاں بند رکھنے کی ہدایت کی گئی، جبکہ بڑی تعداد میں لوگ میٹرو اسٹیشنوں اور زیر زمین پارکنگ میں قائم پناہ گاہوں میں منتقل ہو گئے۔

دریں اثنا، نیٹو اور یورپی یونین کے رکن ملک پولینڈ نے احتیاطی اقدام کے طور پر اپنے لڑاکا طیارے بھی فضا میں بھیج دیے۔ اس سے قبل یوکرینی صدر وولودیمیر زیلنسکی نے روسی حملے سے متعلق خبردار کیا تھا۔