پی آئی اے نے لاہور سے مانچسٹر کیلئے براہِ راست پروازوں کا آغاز کر دیا
- اس موقع پر لاہور ایئرپورٹ پر افتتاحی تقریب بھی منعقد کی گئی۔
پاکستان انٹرنیشنل ایئرلائنز (پی آئی اے) نے لاہور اور مانچسٹر کے درمیان براہِ راست پروازوں کا آغاز کر دیا ہے، جس کی افتتاحی پرواز PK-709 بدھ کی شب لاہور سے روانہ ہوئی۔
پی آئی اے نے جمعرات کو جاری بیان میں بتایا کہ افتتاحی پرواز کے ذریعے 325 مسافر مانچسٹر روانہ ہوئے۔ لاہور سے روانگی کے موقع پر پی آئی اے کی مقامی انتظامیہ اور مانچسٹر ایئرپورٹ گروپ کے حکام نے مسافروں کو رخصت کیا۔
اس موقع پر لاہور ایئرپورٹ پر افتتاحی تقریب بھی منعقد کی گئی۔
تقریب میں شریک مسافروں نے لاہور اور مانچسٹر کے درمیان براہِ راست فضائی رابطے کی بحالی کا خیرمقدم کرتے ہوئے اسے برطانیہ میں مقیم پاکستانی کمیونٹی کے لیے ایک اہم پیش رفت قرار دیا۔
اس نئی سروس کے آغاز کے بعد پاکستان اور مانچسٹر کے درمیان پی آئی اے کی ہفتہ وار پروازوں کی تعداد بڑھ کر پانچ ہو گئی ہے۔
بیان کے مطابق ان میں سے چار ہفتہ وار پروازیں اسلام آباد سے جبکہ ایک ہفتہ وار پرواز لاہور سے مانچسٹر کے لیے آپریٹ کی جائے گی۔
واضح رہے کہ اکتوبر 2025 میں پی آئی اے نے پانچ سال کے وقفے کے بعد برطانیہ کے شہر مانچسٹر کے لیے براہِ راست پروازیں بحال کی تھیں۔ یہ فیصلہ 16 جولائی 2025 کو برطانیہ کی جانب سے پی آئی اے کو اپنی ایئر سیفٹی لسٹ سے نکالنے کے بعد کیا گیا تھا۔
ابتدائی مرحلے میں اسلام آباد اور مانچسٹر کے درمیان ہفتے میں چار پروازیں چلانے کا اعلان کیا گیا تھا، جبکہ اگلے مرحلے میں برمنگھم اور لندن کے لیے بھی براہِ راست پروازیں شروع کرنے کا منصوبہ تھا۔