ٹرمپ نے آبنائے ہرمز کی ناکہ بندی کیلئے امریکی بحریہ کو فوری کارروائی کا حکم دیدیا

صدر ڈونلڈ ٹرمپ نے اعلان کیا ہے کہ امریکی بحریہ فوری طور پر آبنائے ہرمز کی ناکہ بندی شروع کر دے گی اور بین الاقوامی پانیوں میں ان تمام بحری جہازوں کو روکا جائے گا جنہوں نے ایران کو راہداری (ٹول ٹیکس) ادا کیا ہے۔

ٹرمپ نے یہ ریمارکس امریکہ اور ایران کے درمیان ہونے والے امن مذاکرات کے کسی معاہدے کے بغیر ختم ہونے کے چند گھنٹے بعد اپنی سوشل میڈیا ایپ ٹروتھ سوشل پر جاری ایک پوسٹ میں دیے۔ ٹرمپ کا کہنا تھا کہ ملاقات اچھی رہی اور زیادہ تر نکات پر اتفاق ہو گیا تھا، تاہم انہوں نے مزید کہا کہ دونوں فریقین ایران کے جوہری پروگرام پر متفق نہیں ہو سکے۔

ٹرمپ، جو ایران کی جانب سے آبنائے ہرمز سے گزرنے والے جہازوں سے ٹول ٹیکس وصول کرنے کے سخت مخالف ہیں نے کہا کہ فوری طور پر نافذ العمل ہوتے ہوئے ریاست ہائے متحدہ کی بحریہ جو دنیا کی بہترین فوج ہے آبنائے ہرمز میں داخل ہونے یا وہاں سے نکلنے کی کوشش کرنے والے تمام بحری جہازوں کی ناکہ بندی کا عمل شروع کر دے گی۔

انہوں نے مزید کہا میں نے اپنی بحریہ کو یہ ہدایت بھی دی ہے کہ وہ بین الاقوامی پانیوں میں موجود ہر اس جہاز کو تلاش کر کے روک دے جس نے ایران کو ٹول ٹیکس ادا کیا ہے۔ غیر قانونی ٹول ٹیکس ادا کرنے والے کسی بھی جہاز کو کھلے سمندر میں محفوظ راستہ نہیں ملے گا۔