آن لائن سیفٹی ڈیٹا کی فراہمی کا مطالبہ، میٹا، ٹک ٹاک اور ایکس کو برطانوی نگران ادارے کے خلاف قانونی چیلنج میں شکست

میٹا، ٹک ٹاک اور ایکس کو برطانوی ریگولیٹر اوفکام کے خلاف قانونی چیلنج میں جمعے کے روز شکست کا سامنا کرنا پڑا ہے۔ کمپنیوں نے برطانیہ کے نئے آن لائن سیفٹی نظام کے تحت ان سے طلب کردہ معلومات کی مقدار کو عدالت میں چیلنج کیا تھا۔

یہ مقدمہ 2023 کے آن لائن سیفٹی ایکٹ سے متعلق ابتدائی قانونی چیلنجز میں سے ایک ہے، جس کے تحت ٹک ٹاک، ایکس اور میٹا کے فیس بک اور انسٹاگرام جیسے پلیٹ فارمز کے لیے سخت معیارات مقرر کیے گئے ہیں، تاکہ بچوں کو نقصان دہ اور غیر قانونی مواد سے محفوظ رکھا جاسکے۔

اوفکام بتدریج اس قانون پر عمل درآمد کررہا ہے، جس کی خلاف ورزی پر سخت ترین نوعیت کے معاملات میں کمپنیوں کو ان کے عالمی کاروبار کے مجموعی سالانہ حجم کے 10 فیصد تک جرمانے کا سامنا کرنا پڑسکتا ہے۔

فروری میں اوفکام نے ٹیکنالوجی کمپنیوں کو معلوماتی نوٹسز جاری کیے تھے، جن میں مواد کی نگرانی اور اسے ہٹانے سے متعلق تفصیلی اعداد و شمار طلب کیے گئے تھے۔ ان میں یہ معلومات بھی شامل تھیں کہ کتنی پوسٹس ہٹائی گئیں یا ان کی رسائی محدود کی گئی، اور کتنے صارفین کو نقصان دہ مواد کا سامنا کرنا پڑا۔

میٹا، ٹک ٹاک اور ایکس نے موقف اختیار کیا تھا کہ ان نوٹسز کے باعث ان پر ضابطہ جاتی تقاضوں کا غیر معمولی بوجھ پڑے گا، تاہم لندن ہائی کورٹ نے ان کا موقف مسترد کردیا۔

تینوں کمپنیوں اور اوفکام نے تبصرے کے لیے بھیجی گئی درخواستوں کا فوری جواب نہیں دیا۔