فلپائن میں آتش فشاں مایون کا الرٹ لیول 3 کردیا گیا

فلپائن نے وسطی صوبے البے میں واقع آتش فشاں مایون سے معتدل شدت کے دھماکہ خیز لاوے کے اخراج کے بعد جمعے کو الرٹ لیول بڑھا کر تین کر دیا ہے۔

سرکاری زلزلہ پیما ادارے فیوولکس کے مطابق پانچ درجوں پر مشتمل انتباہی نظام میں آتش فشاں کا الرٹ لیول تین تک بڑھایا گیا ہے۔

الرٹ لیول تین کے تحت آئندہ چند دنوں سے چند ہفتوں کے دوران لاوے کے بہاؤ اور خطرناک آتش فشانی سرگرمی کے امکانات بڑھ گئے ہیں۔

حکام نے لوگوں کو ہدایت کی ہے کہ وہ آتش فشاں کے گرد 6 کلومیٹر (3.7 میل) کے خطرے کے علاقے سے دور رہیں، کیونکہ وہاں لاوا بہنے، چٹانیں گرنے اور دیگر آتش فشانی خطرات کا خدشہ ہے۔ ایئرلائنز کو بھی آتش فشاں کی چوٹی کے قریب پروازیں نہ کرنے کی ہدایت کی گئی ہے۔

مایون فلپائن کا سب سے زیادہ فعال آتش فشاں ہے، جہاں گزشتہ چار صدیوں کے دوران 50 سے زائد مرتبہ لاوا پھٹ چکا ہے۔ اس کی تقریباً مکمل مخروطی شکل کے باعث یہ سیاحوں کی توجہ کا مرکز بھی ہے۔

اس کا سب سے تباہ کن دھماکہ فروری 1814 میں ہوا تھا، جب لاوے نے ایک پورے قصبے کو اپنی لپیٹ میں لے لیا اور 1,200 افراد ہلاک ہو گئے تھے۔