ایکزو نوبل پاکستان لمیٹڈ کی پیکیجز گروپ کو فروخت کا عمل مکمل

ایکزو نوبل نے ایکزو نوبل پاکستان لمیٹڈ کی آئی جی آئی انوسٹمنٹس (پرائیویٹ) لمیٹڈ کوفروخت مکمل کرلی ہے جو پاکستان کے مختلف کاروباری شعبوں میں کام کرنے والے معروف پیکیجز گروپ کا حصہ ہے۔

اس فروخت کی مجموعی انٹرپرائز ویلیو تقریباً 50 ملین یورو (16.2 ارب پاکستانی روپے) ہے جبکہ اس کی EV/EBITDA ویلیو14 گنامقرر کی گئی ہے۔

اس معاہدے میں پاکستان میں ایکزو نوبل کے ڈیکوریٹو پینٹس اور لیکوئڈ کوٹنگز کے کاروبار شامل ہیں۔

ایکزو نوبل کے چیف ایگزیکٹو آفیسرGreg Poux-Guillaume نے اس بارے میں بات کرتے ہوئے کہا کہ اس ڈیل کی تکمیل ہماری جاری اسٹریٹجک پورٹ فولیو ریویو پر عمل درآمد میں ایک اور اہم سنگ میل ہے۔ ہم پاکستان میں اپنے ساتھیوں کی جانب سے دکھائے گئے جذبے اور عزم کے شکر گزار ہیں اور ہمیں پورا یقین ہے کہ پیکیجز گروپ، پاکستان کی صارفین اور صنعتی مارکیٹوں میں اپنی مضبوط موجودگی کے باعث، اس کاروبار کو ترقی کے اگلے مرحلے تک لے جانے کے لیے بہترین پوزیشن میں ہے۔

پیکیجز لمیٹڈ کے چیف ایگزیکٹو آفیسر اور مینیجنگ ڈائریکٹر سید حیدر علی نے کہا کہ ہم ایکزو نوبل پاکستان کو پیکیجز گروپ کا حصہ بننے پر خوش آمدید کہتے ہیں۔ یہ ڈیل پاکستان میں اعلیٰ معیار کے کاروبار، مضبوط مارکیٹ پوزیشن رکھنے والے معتبر برانڈز اور طویل مدتی ترقی کی صلاحیت رکھنے والے اداروں کی تعمیر اور انہیں مزید مضبوط بنانے کے ہمارے سفر میں ایک اہم سنگ میل ہے۔